ಬೇಸಗೆ ಪ್ರವಾಸ: ಹಾಟ್ ಸೀಸನ್, ಕೂಲ್ ಟಿಪ್ಸ್..!

• ಹೊಸ್ಮನೆ ಮುತ್ತು

ದೈನಂದಿನ ಯಾಂತ್ರಿಕ ಬದುಕಿನಿಂದ ದೂರವಾಗಿ ಪ್ರಕೃತಿಯ ಮಡಿಲಲ್ಲಿ ಹೊಸ ಚೈತನ್ಯ ಪಡೆಯಲು ಬೇಸಗೆ ರಜೆ ಒಂದು ಸುವರ್ಣ ಅವಕಾಶ. ತೀವ್ರವಾದ ಬಿಸಿಲು ಮತ್ತು ಧೂಳಿನ ಸವಾಲುಗಳ ನಡುವೆಯೂ ಸಮುದ್ರದ ಅಲೆಗಳು, ಗಿರಿಧಾಮಗಳು ಅಥವಾ ಐತಿಹಾಸಿಕ ತಾಣಗಳ ಸೌಂದರ್ಯವನ್ನು ಸವಿಯಲು ಪ್ರವಾಸಿಗರು ಹಾತೊರೆಯುವುದು ಸಹಜ. ಆದರೆ, ಈ ಪ್ರವಾಸವು ಕೇವಲ ತಾಣಗಳ ಆಯ್ಕೆಗೆ ಸೀಮಿತವಾಗದೆ, ವ್ಯವಸ್ಥಿತ ಪ್ಯಾಕಿಂಗ್ ಮತ್ತು ಅಗತ್ಯ ಮುನ್ನೆಚ್ಚರಿಕೆಗಳ ಅರಿವಿನೊಂದಿಗೆ ಕೂಡಿದ್ದರೆ ಮಾತ್ರ ಬೇಸಿಗೆಯ ತಾಪವನ್ನು ತಂಪಾದ ನೆನಪಾಗಿ ಪರಿವರ್ತಿಸಿಕೊಳ್ಳಲು ಸಾಧ್ಯ.

ಇದನ್ನೂ ಓದಿ: ಚಿಲ್ಕಾ ಸರೋವರದಲ್ಲಿ ಒಂದು ಮುತ್ತಿನ ಕಥೆ

ಉಡುಪುಗಳ ಆಯ್ಕೆ: ಉಡುಪುಗಳ ಆಯ್ಕೆಯೇ ಪ್ಯಾಕಿಂಗ್ ಪಟ್ಟಿಯಲ್ಲಿ ಮೊದಲ ಸ್ಥಾನದಲ್ಲಿರಬೇಕು. ಬೇಸಗೆಯ ಪ್ರವಾಸ ಸುಖಕರವಾಗಿರಲು ಹಗುರವಾದ ಕಾಟನ್ ಅಥವಾ ಲಿನನ್‌ನಂಥ ನೈಸರ್ಗಿಕ ನಾರಿನ ಬಟ್ಟೆಗಳ ಆಯ್ಕೆ ಅತ್ಯಗತ್ಯ. ಇವು ಗಾಳಿಯಾಡುವಿಕೆಗೆ ಅನುವು ಮಾಡಿಕೊಟ್ಟು ಬೆವರನ್ನು ಹೀರಿ ದೇಹವನ್ನು ತಂಪಾಗಿರಿಸುತ್ತವೆ. ಸೂರ್ಯನ ಶಾಖವನ್ನು ಹಿಮ್ಮೆಟ್ಟಿಸಲು ಗಾಢ ಬಣ್ಣಗಳ ಬದಲಿಗೆ ಬಿಳಿ ಅಥವಾ ತಿಳಿ ಪೇಸ್ಟಲ್ ಬಣ್ಣದ, ಸಡಿಲವಾದ (Loose fit) ಉಡುಪುಗಳನ್ನು ಧರಿಸುವುದು ಉತ್ತಮ. ಒಟ್ಟಾರೆಯಾಗಿ, ಲೈಟ್ ಕಾಟನ್ ಶರ್ಟ್ ಮತ್ತು ಕ್ವಿಕ್-ಡ್ರೈ ಪ್ಯಾಂಟ್‌ಗಳನ್ನು ಪ್ಯಾಕ್ ಮಾಡುವುದರಿಂದ ಚರ್ಮಕ್ಕೆ ಆರಾಮ ಸಿಗುವುದಲ್ಲದೆ ಪ್ರವಾಸವು ಸುರಕ್ಷಿತ ಮತ್ತು ಸುಖಕರವಾಗಿರುತ್ತದೆ.

ಬಿಸಿಲಿನಿಂದ ರಕ್ಷಣೆ: ಬೇಸಗೆಯ ಮಧ್ಯಾಹ್ನ 12 ರಿಂದ ಸಂಜೆ 4 ಗಂಟೆಯವರೆಗೆ ಸೂರ್ಯನ ಕಿರಣಗಳು ತೀವ್ರವಾಗಿರುವುದರಿಂದ, ಸಾಧ್ಯವಾದಷ್ಟು ಈ ಸಮಯದಲ್ಲಿ ಹೊರಾಂಗಣ ಚಟುವಟಿಕೆಗಳನ್ನು ತಪ್ಪಿಸುವುದು ಉತ್ತಮ. ಅನಿವಾರ್ಯವಾಗಿ ಹೊರಹೋಗಬೇಕಾದಲ್ಲಿ, ಬಿಸಿಲಿನ ಹೊಡೆತ (Heat Stroke) ಮತ್ತು ಕಣ್ಣಿನ ರಕ್ಷಣೆಗಾಗಿ ಉತ್ತಮ ದರ್ಜೆಯ ಯುವಿ ಸನ್‌ಗ್ಲಾಸ್, ಅಗಲವಾದ ಟೋಪಿ ಅಥವಾ ಕೊಡೆಯನ್ನು ಬಳಸುವುದು ಆರೋಗ್ಯದ ದೃಷ್ಟಿಯಿಂದ ಅತ್ಯಗತ್ಯ. ಈ ಸರಳ ಕ್ರಮಗಳು ನಿಮ್ಮ ಪ್ರವಾಸದ ಉತ್ಸಾಹವನ್ನು ಹೆಚ್ಚಿಸಿ, ಬಿಸಿಲಿನ ತಾಪದಿಂದ ನಿಮ್ಮನ್ನು ಕಾಪಾಡುತ್ತವೆ.

ಪಾದಗಳ ಆರೋಗ್ಯ ಮತ್ತು ಪಾದರಕ್ಷೆಗಳ ಆಯ್ಕೆ: ಪ್ರವಾಸದ ಸಮಯದಲ್ಲಿ ಪಾದಗಳ ಆರೋಗ್ಯ ಕಾಪಾಡಿಕೊಳ್ಳಲು ಸರಿಯಾದ ಪಾದರಕ್ಷೆಗಳ ಆಯ್ಕೆ ಬಹಳ ಮುಖ್ಯ. ಹೊಸ ಶೂಗಳಿಗಿಂತ ಮೊದಲೇ ಬಳಸಿ ರೂಢಿಯಿರುವ ಆರಾಮದಾಯಕ ಪಾದರಕ್ಷೆಗಳನ್ನು ಧರಿಸುವುದು 'ಶೂ ಬೈಟ್' ತಡೆಯಲು ಸಹಕಾರಿ. ಬೇಸಗೆಯಲ್ಲಿ ಗಾಳಿಯಾಡುವ ಮೆಶ್ ಸ್ನೀಕರ್ಸ್ ಅಥವಾ ಸ್ಯಾಂಡಲ್‌ಗಳ ಜತೆಗೆ ಬೆವರು ಹೀರುವ ಕಾಟನ್ ಸಾಕ್ಸ್‌ಗಳನ್ನು ಬಳಸುವುದು ಫಂಗಸ್ ಸೋಂಕು ಮತ್ತು ದುರ್ವಾಸನೆಯನ್ನು ತಡೆಯುತ್ತದೆ. ನಡಿಗೆ ಹೆಚ್ಚಿರುವಾಗ ಪಾದಗಳ ಮೇಲಿನ ಒತ್ತಡವನ್ನು ಕಡಿಮೆ ಮಾಡಲು ಮತ್ತು ಹಿಮ್ಮಡಿ ನೋವು ತಡೆಯಲುಕುಶನ್ ಇರುವ ಮೆತ್ತನೆಯ ಸೋಲ್ ಹೊಂದಿರುವ ಪಾದರಕ್ಷೆಗಳನ್ನೇ ಆರಿಸಿಕೊಳ್ಳಿ.

ಪ್ರವಾಸದ ಸ್ಥಳಕ್ಕೆ ತಕ್ಕಂತೆ ಪಾದರಕ್ಷೆಗಳಿರಲಿ; ಕಡಲತೀರದ ಪ್ರವಾಸಕ್ಕೆ ನೀರಿನಲ್ಲಿ ಒದ್ದೆಯಾದರೂ ತ್ವರಿತವಾಗಿ ಒಣಗುವ ‘ಫ್ಲಿಪ್-ಫ್ಲಾಪ್’ ಅಥವಾ ವಾಟರ್ ಸ್ಯಾಂಡಲ್‌ಗಳು ಮತ್ತು ಬೆಟ್ಟಗುಡ್ಡಗಳ ಚಾರಣಕ್ಕೆ ಉತ್ತಮ ಹಿಡಿತವಿರುವ ಸ್ಪೋರ್ಟ್ಸ್ ಶೂಗಳು ಸೂಕ್ತ. ಚರ್ಮದ ಶೂಗಳಿಗಿಂತ ಹಗುರವಾದ ‘ಕ್ಯಾನ್ವಾಸ್’ ಶೂಗಳು ಪ್ರವಾಸಕ್ಕೆ ಹೆಚ್ಚು ಆರಾಮದಾಯಕ. ಪಾದಗಳ ಆರೈಕೆಗಾಗಿ ಸನ್ ಸ್ಕ್ರೀನ್, ಟಾಲ್ಕಮ್ ಪೌಡರ್ ಬಳಸಿ ಮತ್ತು ದಿನದ ಕೊನೆಯಲ್ಲಿ ಪಾದಗಳನ್ನು ಸ್ವಚ್ಛಗೊಳಿಸಿ ಮಾಯಿಶ್ಚರೈಸರ್ ಹಚ್ಚಿ. ಅತಿಯಾದ ನಡಿಗೆಯಿಂದ ಪಾದ ಊದಿಕೊಂಡಿದ್ದರೆ ಮಲಗುವಾಗ ಪಾದಗಳ ಕೆಳಗೆ ದಿಂಬನ್ನಿಟ್ಟುಕೊಳ್ಳಿ. ಒಟ್ಟಿನಲ್ಲಿ, ಸ್ಟೈಲ್‌ಗಿಂತ ಪಾದಗಳ ಆರಾಮಕ್ಕೆ ಆದ್ಯತೆ ನೀಡುವುದು ನಿಮ್ಮ ಪ್ರಯಾಣವನ್ನು ಸುಖಕರವಾಗಿಸುತ್ತದೆ.

ಚರ್ಮ ಮತ್ತು ಕಣ್ಣಿನ ಆರೈಕೆ: ಬಿಸಿಲು ಮತ್ತು ಧೂಳಿನಿಂದ ಚರ್ಮ ಹಾಗೂ ಕಣ್ಣುಗಳನ್ನು ರಕ್ಷಿಸಿಕೊಳ್ಳುವುದು ಬಹಳ ಮುಖ್ಯ. ಸೂರ್ಯನ ಹಾನಿಕಾರಕ ಯುವಿ ಕಿರಣಗಳಿಂದ ರಕ್ಷಣೆ ಪಡೆಯಲು ಉತ್ತಮ ಸನ್ ಸ್ಕ್ರೀನ್ ಲೋಷನ್ ಮತ್ತು ತುಟಿಗಳಿಗಾಗಿ SPF ಇರುವ ಲಿಪ್ ಬಾಮ್ ಬಳಸಿ. ಒಂದು ವೇಳೆ ಚರ್ಮ ಬಿಸಿಲಿನಿಂದ ಕೆಂಪಗಾಗಿದ್ದರೆ ಅಲೋವೆರಾ ಜೆಲ್ ಹಚ್ಚಿ ಶಮನಗೊಳಿಸಿ. ಕೀಟಗಳ ಕಾಟವಿರುವ ಕಡೆ ಕೀಟನಾಶಕ ಕ್ರೀಮ್‌ ಹಾಗೂ ಚರ್ಮದ ತೇವಾಂಶಕ್ಕಾಗಿ ಮಾಯಿಶ್ಚರೈಸರ್ ಅನ್ನು ಪ್ರವಾಸದ ಕಿಟ್‌ನಲ್ಲಿಟ್ಟುಕೊಳ್ಳಿ. ಇನ್ನು ಕಣ್ಣುಗಳ ರಕ್ಷಣೆಗಾಗಿ ಗುಣಮಟ್ಟದ ಸನ್ ಗ್ಲಾಸ್ ಧರಿಸಿ; ಧೂಳಿನಿಂದ ಉರಿ ಕಾಣಿಸಿಕೊಳ್ಳದಂತೆ ಕಾಂಟ್ಯಾಕ್ಟ್ ಲೆನ್ಸ್ ಬದಲಿಗೆ ಕನ್ನಡಕ ಬಳಸಲು ಪ್ರಯತ್ನಿಸಿ. ಆಗಾಗ ಶುದ್ಧ ನೀರಿನಿಂದ ಕಣ್ಣುಗಳನ್ನು ತೊಳೆಯುವ ಮೂಲಕ ಕಣ್ಣಿನ ಆರೋಗ್ಯವನ್ನು ಕಾಪಾಡಿಕೊಳ್ಳಬಹುದು. ಈ ಸರಳ ಮುನ್ನೆಚ್ಚರಿಕೆಗಳು ನಿಮ್ಮ ಪ್ರವಾಸವನ್ನು ಆನಂದದಾಯಕವಾಗಿಸುತ್ತವೆ.

ಕೂದಲಿನ ರಕ್ಷಣೆ: ಸೂರ್ಯನ ಬಿಸಿಲು ಮತ್ತು ಧೂಳಿನಿಂದ ಕೂದಲಿನ ಕಾಂತಿ ಕುಂದದಂತೆ ತಡೆಯಲು ಹೊರಹೋಗುವಾಗ ಟೋಪಿ ಅಥವಾ ಸ್ಕಾರ್ಫ್ ಬಳಸಿ. ಪ್ರವಾಸಕ್ಕೆ ಮುನ್ನ ಕೊಬ್ಬರಿ ಅಥವಾ ಬಾದಾಮಿ ಎಣ್ಣೆಯಿಂದ ಮಸಾಜ್ ಮಾಡುವುದು ಕೂದಲಿಗೆ ಪೋಷಣೆ ನೀಡುತ್ತದೆ. ಕೂದಲನ್ನು ಸಡಿಲವಾಗಿ ಕಟ್ಟುವುದರಿಂದ ಬೆವರು ಆರಿ ಬುಡವು ಆರೋಗ್ಯವಾಗಿರುತ್ತದೆ. ಕೂದಲಿನ ತೇವಾಂಶ ಕಾಪಾಡಲು ಮೈಲ್ಡ್ ಶಾಂಪೂ ಮತ್ತು ಕಂಡಿಷನರ್ ಬಳಸಿ. ಸ್ವಿಮ್ಮಿಂಗ್ ಪೂಲ್ ಅಥವಾ ಸಮುದ್ರದ ನೀರಿಗೆ ಇಳಿಯುವ ಮುನ್ನ ಸ್ವಿಮ್ಮಿಂಗ್ ಕ್ಯಾಪ್ ಧರಿಸುವ ಮೂಲಕ ಕ್ಲೋರಿನ್ ಮತ್ತು ಉಪ್ಪಿನಂಶದಿಂದ ಕೂದಲನ್ನು ರಕ್ಷಿಸಿಕೊಳ್ಳಬಹುದು.

ಹೈಡ್ರೇಶನ್ ಮತ್ತು ಆಹಾರ: ಬೇಸಗೆಯ ಪ್ರಯಾಣದಲ್ಲಿ ದೇಹದ ಜಲಾಂಶ ಕಾಪಾಡಿಕೊಳ್ಳಲು ಸದಾ ನೀರಿನ ಬಾಟಲಿ ಜತೆಗಿರಲಿ ಮತ್ತು ಬಾಯಾರಿಕೆಯಾಗದಿದ್ದರೂ ನೀರು ಕುಡಿಯುತ್ತಿರಿ. ನಿರ್ಜಲೀಕರಣ ತಡೆಯಲು ಎಳನೀರು, ಮಜ್ಜಿಗೆ, ಹಣ್ಣಿನ ರಸ ಅಥವಾ ಎಲೆಕ್ಟ್ರೋಲೈಟ್ ಪಾನೀಯಗಳನ್ನು ಹಾಗೂ ನೀರಿನಂಶ ಹೆಚ್ಚಿರುವ ಕಲ್ಲಂಗಡಿ, ಸೌತೆಕಾಯಿಯಂಥ ಆಹಾರಗಳನ್ನು ಸೇವಿಸಿ. ಎಣ್ಣೆ-ಮಸಾಲೆ ರಹಿತವಾದ ಸುಲಭವಾಗಿ ಜೀರ್ಣವಾಗುವ ಹಗುರ ಆಹಾರಕ್ಕೆ ಆದ್ಯತೆ ನೀಡಿ. ಮುಖ್ಯವಾಗಿ, ಜಠರ ಸಂಬಂಧಿ ಸಮಸ್ಯೆಗಳಿಂದ ದೂರವಿರಲು ಅಶುದ್ಧ ನೀರು ಅಥವಾ ಐಸ್ ಬೆರೆಸಿದ ಪಾನೀಯಗಳಿಂದ ದೂರವಿರಿ.

ಪ್ರವಾಸದ ಸಿದ್ಧತೆಗಳು: ನಿಮ್ಮ ಕಿಟ್‌ನಲ್ಲಿ ಪ್ರಥಮ ಚಿಕಿತ್ಸಾ ಪೆಟ್ಟಿಗೆ, ಅಗತ್ಯ ಔಷಧಿಗಳು ಮತ್ತು ಬ್ಯಾಂಡೇಜ್‌ಗಳು ಕಡ್ಡಾಯವಾಗಿರಲಿ. ತಾಂತ್ರಿಕ ಸಿದ್ಧತೆಯಾಗಿ, ಮೊಬೈಲ್ ನೆಟ್‌ವರ್ಕ್ ಲಭ್ಯವಿಲ್ಲದ ಪ್ರದೇಶಗಳಿಗಾಗಿ ಆಫ್‌ಲೈನ್ ಮ್ಯಾಪ್‌ಗಳನ್ನು ಡೌನ್‌ಲೋಡ್ ಮಾಡಿಕೊಳ್ಳಿ ಹಾಗೂ ಪವರ್ ಬ್ಯಾಂಕ್ ಅನ್ನು ಮರೆಯದೆ ಜತೆಗೆ ಇರಿಸಿಕೊಳ್ಳಿ. ಪರಿಸರ ಸ್ನೇಹಿ ಪ್ರವಾಸಕ್ಕೆ ಆದ್ಯತೆ ನೀಡಿ. ಪ್ಲಾಸ್ಟಿಕ್ ಬಾಟಲಿಗಳನ್ನು ತ್ಯಜಿಸಿ, ಆರೋಗ್ಯಕರ ಹಾಗೂ ಮರುಬಳಕೆ ಮಾಡಬಹುದಾದ ಸ್ಟೀಲ್ ಅಥವಾ ತಾಮ್ರದ ಬಾಟಲಿಗಳನ್ನು ಬಳಸಿ ಪ್ರವಾಸಿ ತಾಣಗಳ ಸ್ವಚ್ಛತೆ ಕಾಪಾಡಿ.

ಪ್ರವಾಸವೆಂದರೆ ಕೇವಲ ಸಂಚಾರವಲ್ಲ; ಅದು ಮನಸ್ಸಿಗೆ ಶಾಂತಿ ಮತ್ತು ಚೈತನ್ಯ ನೀಡುವ ಸುಂದರ ಅನುಭವ. ಪ್ರಯಾಣದ ವೇಳೆ ಸೂಕ್ತ ಮುನ್ನೆಚ್ಚರಿಕೆಗಳನ್ನು ವಹಿಸುವುದು ಮತ್ತು ಬೇಸಿಗೆಯಲ್ಲಿ ವಿಶೇಷವಾಗಿ 'ಕಡಿಮೆ ಲಗೇಜ್, ಹೆಚ್ಚು ಆರಾಮ' ಎಂಬ ಸೂತ್ರ ಪಾಲಿಸುವುದು ಪ್ರವಾಸವನ್ನು ಹೆಚ್ಚು ಸುರಕ್ಷಿತ ಹಾಗೂ ಆರಾಮದಾಯಕವಾಗಿಸುತ್ತದೆ.