ಮಾವು ಎಂದರೆ ಏನೋ ಹರುಷವೂ.. ಮ್ಯಾಂಗೋ ʼಪಿಕ್‌ʼನಿಕ್‌

• ಜ್ಯೋತಿ ಶ್ಯಾಮಸುಂದರ್

ಮಾವಿನಹಣ್ಣು ಎಂದರೆ ಯಾರಿಗೆ ತಾನೇ ಇಷ್ಟವಿಲ್ಲ? ಹಣ್ಣುಗಳ ರಾಜನಾಗಿರುವ ಮಾವು ಪುಟ್ಟ ಮಗುವಿನಿಂದ ಹಿಡಿದು ವೃದ್ಧರ ತನಕ ಇಷ್ಟ ಪಟ್ಟು ತಿನ್ನುವ ಏಕಮಾತ್ರ ಹಣ್ಣು. ಆದರೀಗ ಮಾರುಕಟ್ಟೆಯಲ್ಲಿ ದೊರೆಯುವ ಎಲ್ಲ ಮಾವಿನಹಣ್ಣುಗಳೂ ರಾಸಾಯನಿಕದಲ್ಲಿ ಮಿಂದೇಳುತ್ತವೆ. ಅದನ್ನು ತಿನ್ನುವುದರಿಂದ ಹಲವಾರು ಕಾಯಿಲೆಗಳು ಬರುತ್ತವೆ. ಆದರೆ, ರಾಸಾಯನಿಕ ರಹಿತ ಮಾವಿನಹಣ್ಣು ಸಿಕ್ಕರೆ, ಅದೂ ನಾವೇ ತೋಟದಿಂದ ಕಿತ್ತು ತಂದರೆ ಹೇಗಿರುತ್ತದೆ ಅಲ್ಲವೇ? ನಾನಂತೂ ಬೆಂಗಳೂರಿನಲ್ಲಿದ್ದರೂ ರಾಸಾಯನಿಕ ಮುಕ್ತ ಮಾವಿನಹಣ್ಣನ್ನು ಮನಸೋ ಇಚ್ಛೆ ಕೊಯ್ದು ತಂದು ಸವಿಯುತ್ತೇನೆ. ಹೇಗೆ ಅನ್ನೋ ಪ್ರಶ್ನೆ ನಿಮ್ಮ ಮನಸಲ್ಲೂ ಮೂಡಿದೆ ಅಂತ ನನಗೆ ಗೊತ್ತು. ಬನ್ನಿ ಹಾಗಾದರೆ ನಿಮ್ಮೆಲ್ಲ ಗೊಂದಲಗಳನ್ನೂ ನಿವಾರಿಸುತ್ತೇನೆ.‌

ಮಾವು-ನಾವು

ನಮ್ಮದೊಂದು ʼಮ್ಯಾಂಗೋ ಪಿಕ್‌ʼ ಅನ್ನುವ ವಾಟ್ಸ್‌ಆಪ್‌ ಗ್ರೂಪ್‌ ಇದೆ. ಶ್ಯಾಮಸುಂದರ್‌ ಹೆಗಡೆ ಅನ್ನುವವರು ಅದರ ಅಡ್ಮಿನ್.‌ ಅವರೇ ಪ್ರತಿ ವರ್ಷ ಮಾವಿನ ಹಣ್ಣಿನ ತೋಟಕ್ಕೆ ಸಮಾನ ಮನಸ್ಕರನ್ನು ಕರೆದುಕೊಂಡು ಹೋಗುತ್ತಾರೆ. ಪ್ರತಿ ವರ್ಷವೂ ಮೂರರಿಂದ ನಾಲ್ಕು ಸಲ ಮ್ಯಾಂಗೋ ಪಿಕ್‌ ನಡೆಯುತ್ತದೆ. ಪ್ರತಿ ಪಿಕ್‌ನಲ್ಲೂ ನೂರಾರು ಕುಟುಂಬಗಳು ಬಂದು ಮನ ಬಂದಷ್ಟು ಮಾವಿನಕಾಯಿಗಳನ್ನು ಗಿಡದಿಂದ ನೇರವಾಗಿ ಕಿತ್ತುಕೊಂಡು ಹೋಗುತ್ತಾರೆ. ಮ್ಯಾಂಗೋ ಪಿಕ್‌ನ ಮುಖ್ಯ ಉದ್ದೇಶ ರೈತರು ಬೆಳೆದ ಬೆಳೆಗೆ ಸರಿಯಾದ ಬೆಲೆ ಸಿಗಲಿ ಎನ್ನುವ ಕಳಕಳಿ. ಸಾಮಾನ್ಯವಾಗಿ ರೈತರು ಎಲ್ಲ ಬೆಳೆಗಳನ್ನೂ ಕಷ್ಟಪಟ್ಟು ಬೆಳೆದಿರುತ್ತಾರೆ. ಅದು ಅವರಿಗೆ ವರ್ಷದ ಕೂಳು. ಅಂಥ ಬೆವರಿನ ಬೆಳೆಗೆ ಸರಿಯಾದ ಬೆಲೆ ಸಿಗದೇ ಹೋದಲ್ಲಿ ರೈತರು ತತ್ತರಿಸಿ ಹೋಗುತ್ತಾರೆ. ಮಧ್ಯವರ್ತಿಗಳ ಹಾವಳಿಯಂತೂ ಹೇಳತೀರದು. ರೈತರ ಹಾಗೂ ಗ್ರಾಹಕರ ಹಿತದೃಷ್ಟಿಯಿಂದ ಶ್ಯಾಮಸುಂದರ್‌ ಹೆಗಡೆ ಈ ಮ್ಯಾಂಗೋ ಪಿಕ್‌ ಎಂಬ ಪರಿಕಲ್ಪನೆಯನ್ನು ಹುಟ್ಟುಹಾಕಿದರು.

ಮುಕ್ಕಾಲು ಪ್ರತಿಶತ ಭಾರತೀಯರು ಕೃಷಿ ಮೂಲದವರು. ಆದರೀಗ ಐಟಿ ಯುಗದಲ್ಲಿ ಮೂಲ ಕಸುಬಾದ ಕೃಷಿಯನ್ನು ಮರೆಯುತ್ತಿದ್ದೇವೆ. ಹಾಗಂತ ಎಲ್ಲರೂ ಕೆಲಸಬಿಟ್ಟು ತೋಟ ಮಾಡಬೇಕು ಎಂದು ಹೇಳುತ್ತಿಲ್ಲ. ನಮ್ಮ ಮುಂದಿನ ಪೀಳಿಗೆಗೆ ಕೃಷಿ ಬಗ್ಗೆ ತಿಳಿವಳಿಕೆ ಮೂಡಿಸಿದರೆ ಸಾಕು. ಆ ನಿಟ್ಟಿನಲ್ಲಿ ಇಡುತ್ತಿರುವ ಒಂದು ಪುಟ್ಟ ಹೆಜ್ಜೆಯೇ ಈ ಮ್ಯಾಂಗೋ ಪಿಕ್‌. ಇದನ್ನು ಪಿಕ್‌ ಅನ್ನುವುದಕಿಂತ ಪಿಕ್‌ನಿಕ್‌ ಎಂದರೆ ಹೆಚ್ಚು ಸೂಕ್ತ.

ಪ್ರತಿ ವರ್ಷದ ಹಬ್ಬ

ನಾನು ಪ್ರತಿ ವರ್ಷ ತಪ್ಪದೇ ನನ್ನ ಕುಟುಂಬದೊಂದಿಗೆ ಈ ಮ್ಯಾಂಗೋ ಪಿಕ್‌ಗೆ ಹೋಗುತ್ತೇನೆ. ಈಗಿನ ಮಕ್ಕಳಿಗೆ ತೋಟ‌, ಗದ್ದೆ, ಕೃಷಿ ಎಂದರೆ ಜಾಸ್ತಿ ತಿಳಿದಿರಲಿಕ್ಕಿಲ್ಲ. ಕೆಲವು ಪೋಷಕರು ಅದಕ್ಕೆ ಅವಕಾಶವನ್ನೂ ಮಾಡಿ ಕೊಟ್ಟಿರುವುದಿಲ್ಲ. ಕೆಲವರು ತಮ್ಮ ಮಕ್ಕಳಿಗೆ ತೋಟ, ಕೃಷಿ, ರೈತರ ಬಗ್ಗೆ ತಿಳಿಸುವ, ಪರಿಚಯಿಸುವ ಕನಿಷ್ಠ ಪ್ರಯತ್ನವನ್ನೂ ಮಾಡುವುದಿಲ್ಲ. ನೇರವಾಗಿ ರೈತರ ತೋಟಕ್ಕೆ ಹೋಗುವುದರಿಂದ ಮಕ್ಕಳಿಗೂ ಕೃಷಿ ಬಗ್ಗೆ ಆಸಕ್ತಿ ಮೂಡುತ್ತದೆ. ರೈತರ ಜತೆ ಒಡನಾಡಿ ಕೃಷಿಯ ಬಗ್ಗೆಯೂ ಅರಿವು ಮೂಡುತ್ತದೆ. ನನ್ನ ಮಗಳಿಗಂತೂ ಮ್ಯಾಂಗೋ ಪಿಕ್‌ ಅಂದರೆ ತುಂಬಾ ಇಷ್ಟ. ಮೇ ತಿಂಗಳು ಬಂತೆಂದರೆ ಸಾಕು, ಯಾವಾಗ ಮಾವಿನ ತೋಟಕ್ಕೆ ಹೋಗೋಣ ಅಂತ ದಂಬಾಲು ಬೀಳಲು ಶುರು ಮಾಡುತ್ತಾಳೆ.

ಈ ವರ್ಷದ ಮೊದಲ ಮ್ಯಾಂಗೋ ಪಿಕ್‌ ಮೇ ತಿಂಗಳ ಹದಿನೇಳರಂದು ನಡೆದಿತ್ತು. ಕಾರಣಾಂತರದಿಂದ ನಮಗೆ ಆಗ ಹೋಗಲು ಸಾಧ್ಯವಾಗಿರಲಿಲ್ಲ. ಅದೃಷ್ಟವಶಾತ್ ಕಳೆದ ಭಾನುವಾರ ಅಂದರೆ ಮೇ 31ಕ್ಕೆ ಮತ್ತೆ ಮ್ಯಾಂಗೋ ಪಿಕ್‌ ಇದೆ ಎನ್ನುವ ವಿಷಯ ತಿಳಿಯುತ್ತಿದ್ದಂತೆ ನಾನು, ಮಗಳು, ಪತಿ, ನನ್ನ ತಂಗಿ ಒಟ್ಟಾರೆ ನಮ್ಮ ಕುಟುಂಬದವರೆಲ್ಲ ಕುಣಿದಾಡಿಬಿಟ್ಟೆವು. ನಮ್ಮ ಜತೆ ಹಲವು ಸ್ನೇಹಿತರೂ ಬರುವುದೆಂದು ನಿರ್ಧಾರವಾಯಿತು. ಮಗಳಂತೂ ಯಾವಾಗ ಭಾನುವಾರ ಬರುತ್ತದೆ ಎಂದು ಎಣಿಸಲು ಶುರು ಮಾಡಿದ್ದಳು.

ಇದನ್ನೂ ಓದಿ: ಕುಂತ್ರು ನಿಂತ್ರು ಕುಂತಿಬೆಟ್ಟದ್ದೇ ಧ್ಯಾನ!