ತುರ್ತುಸ್ಥಿತಿ ಅಲ್ಲದ ತುರ್ತುಸ್ಥಿತಿ

ಜೂನ್ 28, 2025. ಎಮಿರೇಟ್ಸ್‌ನ ಫ್ಲೈಟ್ EK 203 ದುಬೈ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಿಂದ (DXB) ಬೆಳಗ್ಗೆ 2.50ರ ಸುಮಾರಿಗೆ ಹೊರಟು, ನ್ಯೂಯಾರ್ಕ್‌ನ ಜಾನ್ ಎಫ್.ಕೆನಡಿ (ಜೆಎಫ್‌ʼಕೆ) ವಿಮಾನ ನಿಲ್ದಾಣಕ್ಕೆ 13 ಗಂಟೆ 43 ನಿಮಿಷಗಳ ಕಾಲ ಪ್ರಯಾಣಿಸಿ ಬಂದಿಳಿಯಿತು. ವಿಮಾನವು ಅಮೆರಿಕದ ಈಶಾನ್ಯ ಭಾಗದ ಮೇಲೆ ಹಾರುತ್ತಿರುವಾಗ, ಒಂದು ಎಂಜಿನ್‌ನಲ್ಲಿ ತಾಂತ್ರಿಕ ದೋಷ ಕಂಡುಬಂದಿತು.

ಆಗ ಪೈಲಟ್ ತಕ್ಷಣ ಎಡಭಾಗದ ರೋಲ್ಸ್-ರಾಯ್ಸ್ ಟ್ರೆಂಟ್ 972 ಎಂಜಿನ್ ನ ಕಾರ್ಯನಿರ್ವಹಣೆಯನ್ನು ಸ್ಥಗಿತಗೊಳಿಸಿದ. ಎ-380 ವಿಮಾನವು ನಾಲ್ಕು ಎಂಜಿನ್‌ಗಳನ್ನು ಹೊಂದಿದ್ದು, ಮೂರು ಎಂಜಿನ್‌ಗಳಿಂದಲೂ ಸುರಕ್ಷಿತವಾಗಿ ಹಾರಾಟ ನಡೆಸಬಲ್ಲದು. ಆದರೂ, ಈ ಸಂದರ್ಭವು ತುರ್ತು ಸ್ಥಿತಿಯನ್ನು ಒಡ್ಡಿತು.

ಇದಕ್ಕೆ ತಕ್ಷಣದ ಕ್ರಿಯೆ ಮತ್ತು ಸಮನ್ವಯತೆ ಅಗತ್ಯವಾಗಿತ್ತು. ಎ-380 ವಿಮಾನವು ವಿಶ್ವದ ಅತಿ‌ ದೊಡ್ಡ ಪ್ರಯಾಣಿಕ ವಿಮಾನವಾಗಿದ್ದು, ಇದರ ನಾಲ್ಕು ಎಂಜಿನ್‌ಗಳು, ಒಂದು ಎಂಜಿನ್ ವಿಫಲವಾದರೂ ಸುರಕ್ಷಿತ ಹಾರಾಟಕ್ಕೆ ಸಾಕಷ್ಟು ಶಕ್ತಿಯನ್ನು ಒದಗಿಸುತ್ತವೆ. ಈ ಘಟನೆಯಲ್ಲಿ, ವಿಮಾನವು ತನ್ನ ಗಮ್ಯಸ್ಥಾನವಾದ ಜೆಎಫ್‌ ಕೆ ವಿಮಾನ ನಿಲ್ದಾಣಕ್ಕೆ ತಲುಪಲು ಸಾಕಷ್ಟು ಶಕ್ತಿಯನ್ನು ಹೊಂದಿತ್ತು, ಆದ್ದರಿಂದ ಬೇರೆ ವಿಮಾನ ನಿಲ್ದಾಣದಲ್ಲಿ ತುರ್ತು ಭೂಸ್ಪರ್ಶ (diversion) ಮಾಡುವ ಅಗತ್ಯ ಉಂಟಾಗಲಿಲ್ಲ.

ಇದನ್ನೂ ಓದಿ: ವಿಮಾನಗಳು ಡಿಕ್ಕಿಯಾಗದಿರಲು ಕಾರಣ ?

ವಿಮಾನದಲ್ಲಿ 24.8 ಟನ್ ಇಂಧನ ಉಳಿದಿತ್ತು, ಇದು ಸುಮಾರು ಒಂದು ಗಂಟೆಯ ಹಾರಾಟಕ್ಕೆ ಸಾಕಾಗಿತ್ತು. ಒಟ್ಟು 450 ಪ್ರಯಾಣಿಕರು ಮತ್ತು ಸಿಬ್ಬಂದಿ ವಿಮಾನದಲ್ಲಿದ್ದರು. ವಿಮಾನವು ಬೋಸ್ಟನ್ ಸೆಂಟರ್‌ನ ನಿಯಂತ್ರಣದಲ್ಲಿದ್ದಾಗ, ಎಟಿಸಿ (ಏರ್ ಟ್ರಾಫಿಕ್ ಕಂಟ್ರೋಲ್) ಸಿಬ್ಬಂದಿಯು ವಿಮಾನದ ಎಂಜಿನ್ ಸ್ಥಿತಿಯ ಬಗ್ಗೆ ಖಚಿತಪಡಿಸಿಕೊಂಡರು. ‌

ಪೈಲಟ್‌ಗಳು ಎಂಜಿನ್ ಸಂಖ್ಯೆ 1 ಸ್ಥಗಿತಗೊಂಡಿರುವುದನ್ನು ದೃಢಪಡಿಸಿದರು. ಈ ಸಂದರ್ಭದಲ್ಲಿ, ಬೋಸ್ಟನ್ ಸೆಂಟರ್‌ನಿಂದ ನಿಯಂತ್ರಣವನ್ನು ನ್ಯೂಯಾರ್ಕ್ ಅಪ್ರೋಚ್‌ಗೆ ವರ್ಗಾಯಿಸಲಾಯಿತು ಮತ್ತು ತುರ್ತುಸ್ಥಿತಿಯನ್ನು ಘೋಷಿಸಲಾಯಿತು. ಇದರಿಂದ ವಿಮಾನಕ್ಕೆ ಆದ್ಯತೆಯ ಲ್ಯಾಂಡಿಂಗ್ ಅನುಮತಿ ಮತ್ತು ತುರ್ತುಸೇವೆಗಳ ಸಿದ್ಧತೆ ಖಾತರಿಯಾಯಿತು.

ನ್ಯೂಯಾರ್ಕ್ ಅಪ್ರೋಚ್‌ನ ಎಟಿಸಿ ನಿಯಂತ್ರಕರು ವಿಮಾನವನ್ನು ಜೆಎಫ್ ಕೆಯ ರನ್‌ವೇ ಮೇಲೆ ಭೂಸ್ಪರ್ಶಕ್ಕೆ ಮಾರ್ಗದರ್ಶನ ಮಾಡಿದರು. ಇದು ವಿಮಾನ ನಿಲ್ದಾಣದ ಅತಿ ಉದ್ದದ ರನ್‌ವೇ ಆಗಿದೆ. ಇದಕ್ಕೆ ಕಾರಣ, ಎ-380 ಒಂದು ದೊಡ್ಡ ವಿಮಾನವಾಗಿದ್ದು, ತುರ್ತು ಭೂಸ್ಪರ್ಶಕ್ಕೆ ಉದ್ದದ ರನ್‌ವೇ ಅಗತ್ಯ. ‌

ಪೈಲಟ್‌ಗಳು ಇಂಧನದ ಪ್ರಮಾಣ, ಸ್ಥಳೀಯ ಒತ್ತಡದ ಮಾಪನ (inches of mercury) ಮತ್ತು ಇತರ ತಾಂತ್ರಿಕ ವಿವರಗಳನ್ನು ಎಟಿಸಿಯೊಂದಿಗೆ ತಕ್ಷಣವೇ ಹಂಚಿಕೊಂಡರು. ಎಂಜಿನ್ ಸ್ಥಗಿತಗೊಂಡರೂ, ಪೈಲಟ್‌ಗಳು ಶಾಂತವಾಗಿರುವುದರ ಜತೆಗೆ ವಿಮಾನವನ್ನು ಸಂಪೂರ್ಣವಾಗಿ ನಿಯಂತ್ರಣದಲ್ಲಿಟ್ಟರು. ಅವರು ಎಟಿಸಿಯಿಂದ ಕೇಳಲಾದ ಎಲ್ಲ ಮಾಹಿತಿಯನ್ನು (ಇಂಧನದ ಪ್ರಮಾಣ, ಒತ್ತಡದ ಮಾಪನ) ತಕ್ಷಣವೇ ಒದಗಿಸಿದರು.

ಎಟಿಸಿ ನಿಯಂತ್ರಕರು ತುರ್ತುಸ್ಥಿತಿಯನ್ನು ಘೋಷಿಸಿ, ವಿಮಾನಕ್ಕೆ ಆದ್ಯತೆಯ ಲ್ಯಾಂಡಿಂಗ್ ಅವಕಾಶ ಕಲ್ಪಿಸಿದರು. ಅವರು ವಿಮಾನದ ಇಳಿಕೆ, ವೇಗ ಮತ್ತು ಭೂಸ್ಪರ್ಶದ ತಯಾರಿಗಳಿಗೆ ಸ್ಪಷ್ಟ ಮಾರ್ಗದರ್ಶನ ನೀಡಿದರು. ವಿಮಾನವು ಸ್ಥಳೀಯ ಕಾಲಮಾನ ಬೆಳಗ್ಗೆ 8.57ಕ್ಕೆ ನಿಗದಿತ ರನ್‌ವೇ ಮೇಲೆ ಸುರಕ್ಷಿತವಾಗಿ ಭೂಸ್ಪರ್ಶ ಮಾಡಿತು.

ತುರ್ತುಸೇವೆಗಳು ಸಿದ್ಧವಾಗಿದ್ದವು, ಆದರೆ ಯಾವುದೇ ತೊಡಕು ಉಂಟಾಗಲಿಲ್ಲ. ವಿಮಾನವು ತನ್ನ ಶಕ್ತಿಯಿಂದಲೇ ಗೇಟ್‌ಗೆ ತಲುಪಿತು. ಆದರೆ, ಎಂಜಿನ್ ಸಮಸ್ಯೆಯಿಂದಾಗಿ ವಿಮಾನವನ್ನು ಜೆ‌ಫ್‌ ಕೆಯಲ್ಲಿ ಒಂದು ವಾರದವರೆಗೆ ಗ್ರೌಂಡ್ ಮಾಡಲಾಯಿತು. ಈ ಸಮಯದಲ್ಲಿ, ಎಂಜಿನ್‌ನ ತಪಾಸಣೆ ಮತ್ತು ದುರಸ್ತಿಗಾಗಿ ತಾಂತ್ರಿಕ ಸಿಬ್ಬಂದಿವರ್ಗವು ಕೆಲಸ ಮಾಡಿತು.

ಎಂಜಿನ್ ಸ್ಥಗಿತದ ನಿಖರ ಕಾರಣವನ್ನು ತಕ್ಷಣ ಬಹಿರಂಗಪಡಿಸಲಿಲ್ಲ, ಆದರೆ ತನಿಖೆಯನ್ನು ಆರಂಭಿಸಲಾಯಿತು. ಈ ಘಟನೆಯಿಂದ ಎಮಿರೇಟ್ಸ್‌ಗೆ ಕಾರ್ಯಾಚರಣೆಯ ತೊಂದರೆಯಾಯಿತು. ವಿಮಾನವು ಒಂದು ವಾರ ಗ್ರೌಂಡ್ ಆಗಿದ್ದರಿಂದ, ನಿಗದಿತವಾಗಿದ್ದ ರಿಟರ್ನ್ ಫ್ಲೈಟ್ ರದ್ದಾಯಿತು. ಇದರಿಂದ ಎಮಿರೇಟ್ಸ್‌ನ ವೇಳಾಪಟ್ಟಿಯಲ್ಲಿ ತೊಂದರೆಯಾಯಿತು ಮತ್ತು ಪ್ರಯಾಣಿಕರಿಗೆ ಪರ್ಯಾಯ ವಿಮಾನಗಳನ್ನು ಒದಗಿಸಬೇಕಾಯಿತು. ಎಂಜಿನ್ ದೋಷಕ್ಕೆ ಕಾರಣವನ್ನು ತಕ್ಷಣ ಗುರುತಿಸಲಾಗಲಿಲ್ಲ. ಆದರೆ ಇಂಥ ಘಟನೆಗಳು ರೋಲ್ಸ್-ರಾಯ್ಸ್ ಟ್ರೆಂಟ್ ಎಂಜಿನ್‌ಗಳಲ್ಲಿ ಹಿಂದೆ ಯೂ ಕಂಡುಬಂದಿವೆ.