ಐಲ್ಯಾಂಡ್ ಮಧ್ಯೆ ಅಡ್ವೆಂಚರ್ & ಪೀಸ್

ಥೈಲ್ಯಾಂಡ್‌ನ ಅತ್ಯಂತ ಲಕ್ಸುರಿ ಮತ್ತು ಎಕ್ಸ್‌ಕ್ಲೂಸಿವ್ ರೆಸಾರ್ಟ್‌ಗಳಲ್ಲಿ ಒಂದಾದ ಸೊನೆವಾ ಕಿರಿ (Soneva Kiri) ಬಗ್ಗೆ ಕೇಳಿದ್ದೀರಾ? ಇದು ಗಲ್ಫ್ ಆಫ್ ಥೈಲ್ಯಾಂಡ್‌ನಲ್ಲಿರುವ ‘ಕೋ ಕೂಡ್’ (Koh Kood) ಅನ್ನೋ ಸಕತ್ ಸುಂದರವಾದ, ಯಾರಿಗೂ ಅಷ್ಟಾಗಿ ಗೊತ್ತಿಲ್ಲದ ದ್ವೀಪದಲ್ಲಿ ಅಡಗಿ ಕುಳಿತಿದೆ. ಗದ್ದಲದ ಲೈಫ್‌ನಿಂದ ದೂರ ಹೋಗಿ ಪ್ರಕೃತಿ ಮಡಿಲಲ್ಲಿ ಪ್ರೈವೆಸಿ ಬೇಕು, ರಾಜಾತಿಥ್ಯ ಥರ ಕಾಲ ಕಳೆಯಬೇಕು ಅಂದುಕೊಳ್ಳುವ ಟ್ರಾವೆಲರ್ಸ್‌ಗೆ ಇದೊಂದು ಪರ್ಫೆಕ್ಟ್ ಜಾಗ.

ಇಲ್ಲಿಗೆ ತಲುಪುವುದೇ ಒಂದು ದೊಡ್ಡ ಅಡ್ವೆಂಚರ್! ಬ್ಯಾಂಕಾಕ್‌ನಿಂದ ರೆಸಾರ್ಟ್‌ನವರದೇ ಆದ ಪ್ರೈವೇಟ್ ಫ್ಲೈಟ್‌ನಲ್ಲಿ ಬಂದು, ಅಲ್ಲಿಂದ ಚೂರು ಸ್ಪೀಡ್ ಬೋಟ್ ಜರ್ನಿ ಮಾಡಿದರೆ ನೀವು ಸೊನೆವಾ ಕಿರಿ ತಲುಪುತ್ತೀರಿ. ಅಲ್ಲಿಗೆ ಕಾಲಿಡುತ್ತಲೇ ನಾವೇನೋ ಒಂಥರಾ ಸ್ಪೆಷಲ್ ಎನ್ನುವ ಫೀಲಿಂಗ್ ಶುರುವಾಗಿಬಿಡುತ್ತದೆ! ಸುತ್ತಲೂ ದಟ್ಟವಾದ ಮಳೆಕಾಡು, ಕಣ್ಣಿಗೆ ತಂಪು ನೀಡುವ ತಿಳಿನೀರು, ಸೈಲೆಂಟಾಗಿರುವ ಬೀಚ್‌ಗಳು... ಅಬ್ಬಾ, ಒಂಥರಾ ಸ್ವರ್ಗವೇ ಕಣ್ಣೆದುರು ನಿಂತ ಹಾಗಿರುತ್ತದೆ.

ಇದನ್ನೂ ಓದಿ: ಗುರು ಕ್ಯಾಂಟೀನ್

ವಿಲ್ಲಾಗಳ ವೈಭೋಗ

2009ರಲ್ಲೇ ಶುರುವಾದ ಈ ರೆಸಾರ್ಟ್‌ನಲ್ಲಿ ಬೆರಳೆಣಿಕೆಯಷ್ಟು ಮಾತ್ರ ವಿಲ್ಲಾಗಳು ಹಾಗೂ ಪ್ರೈವೇಟ್ ರೆಸಿಡೆನ್ಸ್‌ಗಳಿವೆ. ಹಾಗಾಗಿ ಇಲ್ಲಿ ಜನಜಂಗುಳಿ ಇರುವುದಿಲ್ಲ. ನಿಮಗೇ ಅಂತ ಫುಲ್ ಪರ್ಸನಲ್ ಅಟೆನ್ಷನ್ ಸಿಗುತ್ತದೆ. ಒನ್-ಬೆಡ್‌ರೂಮ್ ರಿಟ್ರೀಟ್‌ಗಳಿಂದ ಹಿಡಿದು, ಫ್ಯಾಮಿಲಿ ಅಥವಾ ಗ್ಯಾಂಗ್ ಜತೆ ಬರಲು ದೊಡ್ಡ ದೊಡ್ಡ ಮಲ್ಟಿ-ಬೆಡ್‌ರೂಮ್ ಮನೆಗಳೂ ಇಲ್ಲಿವೆ.

ಇಲ್ಲಿರುವ ಪ್ರತಿಯೊಂದು ವಿಲ್ಲಾವನ್ನು ಪರಿಸರಕ್ಕೆ ಹಾನಿ ಮಾಡದ ನೈಸರ್ಗಿಕ ವಸ್ತುಗಳಿಂದಲೇ ಡಿಸೈನ್ ಮಾಡಿದ್ದಾರೆ. ಸುತ್ತಲಿನ ಪ್ರಕೃತಿಗೆ ಇದು ಮ್ಯಾಚ್ ಆಗೋ ರೀತಿ ಕಾಣುತ್ತದೆ. ಪ್ರತಿಯೊಂದು ವಿಲ್ಲಾಗೂ ಪ್ರೈವೇಟ್ ಇನ್ಫಿನಿಟಿ ಪೂಲ್ ಇದೆ! ವಿಶಾಲವಾದ ಓಪನ್-ಏರ್ ಲಿವಿಂಗ್ ಸ್ಪೇಸ್ ಮತ್ತು ಪ್ರಕೃತಿಯ ಮಧ್ಯೆ ಇರೋ ಓಪನ್ ಬಾತ್‌ರೂಮ್‌ಗಳಿವೆ. ಕಣ್ಣು ಹಾಯಿಸಿದ ಕಡೆಗೆಲ್ಲಾ ಸಮುದ್ರ ಇಲ್ಲವೇ ಕಾಡಿನ ಅದ್ಭುತ ನೋಟ ಸಿಗುತ್ತೆ.

ಸೊನೆವಾ ಬ್ರ್ಯಾಂಡ್‌ನ ಸ್ಪೆಷಾಲಿಟಿಯೇ ಈ ‘ಬೇರ್‌ಫುಟ್ ಲಕ್ಸುರಿ’. ಏಷ್ಯಾದಲ್ಲೇ ಇಷ್ಟೊಂದು ದೊಡ್ಡದಾದ ಮತ್ತು ಲಕ್ಸುರಿಯಾದ ವಿಲ್ಲಾಗಳು ಬೇರೆ ಎಲ್ಲೂ ಇಲ್ಲ ಅಂತ ಟ್ರಾವೆಲ್ ಎಕ್ಸ್‌ಪರ್ಟ್ಸ್ ಹೇಳುತ್ತಾರೆ.

ಪ್ರಕೃತಿಗೆ ಫಸ್ಟ್ ಪ್ರಿಫರೆನ್ಸ್!

ಸೊನೆವಾ ಕಿರಿಯ ಮತ್ತೊಂದು ಸಖತ್ ಫೀಚರ್ ಅಂದ್ರೆ ಅದು ಪರಿಸರದ ಮೇಲಿಟ್ಟಿರೋ ಪ್ರೀತಿ. ಮನಬಂದಂತೆ ಬಿಲ್ಡಿಂಗ್ ಕಟ್ಟಿ ಪ್ರಕೃತಿಯನ್ನು ಹಾಳು ಮಾಡೋ ಜಾಯಮಾನ ಇವರದ್ದಲ್ಲ. ಬದಲಿಗೆ, ಪರಿಸರ ಸ್ನೇಹಿ ಡಿಸೈನ್ ಮತ್ತು ಜವಾಬ್ದಾರಿಯುತ ಪ್ರವಾಸೋದ್ಯಮಕ್ಕೆ ಇವರು ಹೆಸರುವಾಸಿ. ಕಸದ ಮರುಬಳಕೆ, ಲೋಕಲ್ ಆಗಿ ಸಿಗೋ ವಸ್ತುಗಳ ಬಳಕೆ ಮತ್ತು ಪ್ರಕೃತಿ ಸಂರಕ್ಷಣೆಗೆ ಇವರು ಸದಾ ರೆಡಿ. ಇದರಿಂದಾಗಿ ಪರಿಸರಕ್ಕೆ ತೊಂದರೆ ಕೊಡದೆ, ಪ್ರಕೃತಿಯ ಸೌಂದರ್ಯವನ್ನು ಸವಿಯುತ್ತಾ ಪ್ರಪಂಚದ ನಂಬರ್ ಒನ್ ಲಕ್ಸುರಿಯನ್ನು ಎಂಜಾಯ್ ಮಾಡಬಹುದು.

ಟ್ರೀಪಾಡ್ ಡೈನಿಂಗ್

ಇಲ್ಲಿ ಊಟ ಮಾಡುವುದು ಜನ್ಮದಲ್ಲಿ ಮರೆಯಲಾಗದ ಎಕ್ಸ್‌ಪೀರಿಯನ್ಸ್! ಈ ರೆಸಾರ್ಟ್ ವರ್ಲ್ಡ್ ಫೇಮಸ್ ಆಗಿರುವುದಕ್ಕೆ ಇಲ್ಲಿರುವ ‘ಟ್ರೀಪಾಡ್ ಡೈನಿಂಗ್’ ಅನ್ನೋ ಕಾನ್ಸೆಪ್ಟ್ ಕೂಡ ಒಂದು ಕಾರಣ. ದೊಡ್ಡ ಮರದ ಮೇಲಿರೋ ಬಿದಿರಿನ ಪಾಡ್‌ಗಳ ಒಳಗೆ ನೀವು ಕೂತಿರುತ್ತೀರಿ. ಅಲ್ಲಿಗೆ ಸರ್ವರ್‌ಗಳು ಜಿಪ್ ಲೈನ್ ಮೂಲಕ ಹಾರಿಕೊಂಡು ಬಂದು ನಿಮಗೆ ಬಿಸಿಬಿಸಿ ಸೂಪರ್ ಅಡುಗೆಯನ್ನು ಸರ್ವ್ ಮಾಡುತ್ತಾರೆ!

ಮರದ ಮೇಲಿಂದ ಕಾಣುವ ಆ ಪ್ರಕೃತಿಯ ಸೌಂದರ್ಯವನ್ನು ಸವಿಯುತ್ತಾ ಜಿಪ್‌ಲೈನ್ ಊಟ ಸವಿಯುವುದು ನಿಜಕ್ಕೂ ಅದ್ಭುತ. ಇದಲ್ಲದೆ ಥಾಯ್ ಮತ್ತು ಇಂಟರ್ನ್ಯಾಷನಲ್ ರುಚಿಗಳನ್ನು ನೀಡುವ ಬೇರೆ ರೆಸ್ಟೋರೆಂಟ್‌ಗಳೂ ಇವೆ. ಇಲ್ಲಿ ಬಳಸುವ ಪ್ರತಿಯೊಂದು ಪದಾರ್ಥವೂ ಫ್ರೆಶ್ ಆಗಿರುತ್ತದೆ, ಕ್ರಿಯೇಟಿವ್ ಆಗಿ ಪ್ರೆಸೆಂಟ್ ಮಾಡುತ್ತಾರೆ.

ಮಸ್ತಿ ಮತ್ತು ಮನರಂಜನೆ

ಇಲ್ಲಿ ಸುಮ್ಮನೆ ರೆಸ್ಟ್ ಮಾಡ್ತೀನಿ ಅಂದ್ರೂ ಓಕೆ, ಅಡ್ವೆಂಚರ್ ಮಾಡ್ತೀನಿ ಅಂದ್ರೂ ಓಕೆ. ಸ್ನಾರ್ಕ್ಲಿಂಗ್, ಡೈವಿಂಗ್, ಕಯಾಕಿಂಗ್, ಸರ್ಫಿಂಗ್ ಮಾಡಬಹುದು. ಟೆನ್ನಿಸ್ ಆಡಬಹುದು, ಯೋಗ ಸೆಷನ್‌ಗಳಲ್ಲಿ ಭಾಗವಹಿಸಬಹುದು. ಫುಲ್ ರಿಲ್ಯಾಕ್ಸ್ ಆಗ್ಬೇಕು ಅನ್ಸಿದ್ರೆ ಲಕ್ಸುರಿ ಸ್ಪಾದಲ್ಲಿ ಮಸಾಜ್ ಮಾಡಿಸಿಕೊಳ್ಳಬಹುದು.

ಮಕ್ಕಳಿಗಂತೂ ಇಲ್ಲಿ ಸ್ಪೆಷಲ್ ಸೌಲಭ್ಯಗಳು ಮತ್ತು ಕಲಿಯೋಕೆ ಮಸ್ತ್ ಎಜುಕೇಷನಲ್ ಪ್ರೋಗ್ರಾಂಗಳಿವೆ. ಇನ್ನು ರೆಸಾರ್ಟ್‌ನ ಪ್ರೈವೇಟ್ ಬೀಚ್‌ಗಳಲ್ಲಿ ಸ್ವಿಮ್ಮಿಂಗ್ ಮಾಡ್ತಾ, ಸನ್-ಬಾತ್ ತಗೋಬಹುದು. ದ್ವೀಪದ ಒಳಗಡೆ ಹೋದ್ರೆ ಜಲಪಾತಗಳು, ಮೀನುಗಾರರ ಹಳ್ಳಿಗಳು ಕಣ್ಣಿಗೆ ಬೀಳ್ತವೆ. ಇಡೀ ರೆಸಾರ್ಟ್ ತುಂಬಾನೇ ವಿಶಾಲವಾಗಿರೋದ್ರಿಂದ, ನೀವು ಆರಾಮಾಗಿ ಓಡಾಡಲು ನಿಮಗೊಂದು ಪರ್ಸನಲ್ ಎಲೆಕ್ಟ್ರಿಕ್ ಬಗ್ಗಿ ಕೂಡ ಕೊಡ್ತಾರೆ. ನಿಮ್ ಇಷ್ಟ ಬಂದ ಹಾಗೆ ಓಡಾಡಬಹುದು!

ಪ್ರಕೃತಿಯ ಸಹಜತೆಯ ಜತೆಗೆ ಅಲ್ಟಿಮೇಟ್ ಲಕ್ಸುರಿಯನ್ನು ಹೇಗೆ ಕೊಡಬಹುದು ಎನ್ನುವುದಕ್ಕೆ ಸೊನೆವಾ ಕಿರಿ ಬೆಸ್ಟ್ ಎಕ್ಸಾಂಪಲ್. ಅಲ್ಲಿನ ಪರ್ಸನಲೈಸ್ಡ್ ಸರ್ವಿಸ್, ವಿಶಾಲವಾದ ವಿಲ್ಲಾಗಳು, ಕ್ರೇಜಿ ಡೈನಿಂಗ್ ಮತ್ತು ಪ್ರಕೃತಿಗೆ ಹತ್ತಿರವಾಗಿರೋ ಆಕ್ಟಿವಿಟಿಗಳು ಲೈಫ್‌ಟೈಮ್ ನೆನಪಿನಲ್ಲಿ ಉಳಿಯುತ್ತವೆ. ಅಪ್ಪಟ ಪ್ರಕೃತಿಯ ಮಡಿಲಲ್ಲಿ ಐಷಾರಾಮಿ ರಜೆ ಕಳೆಯಬೇಕು ಅನ್ಕೊಳ್ಳೋರಿಗೆ ಸೊನೆವಾ ಕಿರಿ ನಿಜಕ್ಕೂ ಒಂದು ಅದ್ಭುತ ತಾಣ, ಹಾಗೇ ಸಸ್ಟೈನಬಲ್ ಲಕ್ಸುರಿಗೆ ಒಂದು ರೋಲ್ ಮಾಡೆಲ್!