ಮದ್ವೆ ಮಾಡ್ಕೊಳ್ಳಿ..ಮಕ್ಳು ಮಾಡ್ಕೊಳ್ಳಿ; ಸರ್ಕಾರದಿಂದ ಸಿಗುತ್ತೆ ಸೂಪರ್ ಆಫರ್

ದಕ್ಷಿಣ ಕೊರಿಯಾ, ವಿಶ್ವದಲ್ಲೇ ಅತ್ಯಂತ ಕಡಿಮೆ ಜನನ ಪ್ರಮಾಣವನ್ನು ಹೊಂದಿರುವ ದೇಶ. ದಕ್ಷಿಣ ಕೋರಿಯಾ ಸರ್ಕಾರಕ್ಕೆ ಜನಸಂಖ್ಯೆಯನ್ನು ಹೆಚ್ಚಿಸಿಕೊಳ್ಳುವುದು ಅನಿವಾರ್ಯವಾಗಿದ್ದು,ಇದೇ ಕಾರಣಕ್ಕೆ ಹೊಸ ಹೊಸ ಯೋಜನೆಗಳನ್ನು ಜಾರಿಗೆ ತರುತ್ತಿದೆ.

ದೇಶದಲ್ಲಿ ಕುಸಿಯುತ್ತಿರುವ ಜನಸಂಖ್ಯೆಯನ್ನು ಹೆಚ್ಚಿಸುವುದಷ್ಟೇ ಅಲ್ಲದೆ ಯುವಕರನ್ನು ಮದುವೆಗೆ ಪ್ರೋತ್ಸಾಹಿಸುವ ಉದ್ದೇಶದೊಂದಿಗೆ ದಕ್ಷಿಣ ಕೊರಿಯಾದ ಸರ್ಕಾರವು ಹೊಸ ಯೋಜನೆಯನ್ನು ಜಾರಿಗೆ ತಂದಿದೆ. ದಕ್ಷಿಣ ಕೊರಿಯಾದ ಬುಸಾನ್ ಜಿಲ್ಲೆಯಲ್ಲಿ ವಿಶೇಷ ಮ್ಯಾಚ್‌ಕಿಂಗ್ ಕಾರ್ಯಕ್ರಮವನ್ನು ಆಯೋಜಿಸಿದ್ದು, ಈ ಕಾರ್ಯಕ್ರಮದಲ್ಲಿ ಭಾಗವಹಿಸಿ ಮದುವೆಯಾದ ಜೋಡಿಗೆ ಸರ್ಕಾರವೇ ಸುಮಾರು $14,700 ಅಂದ್ರೆ ಸುಮಾರು 12 ಲಕ್ಷ ರೂಪಾಯಿಯನ್ನು ನೀಡುತ್ತಿದೆ. ಕಳೆದ ವರ್ಷ, 31 ಲಕ್ಷ ರೂಪಾಯಿ ಅಂದರೆ 38000 ಡಾಲ‌ರ್ ನೀಡಿತ್ತು. ಇಲ್ಲಿ ಜನನ ಪ್ರಮಾಣವು 2023ರಲ್ಲಿ 0.72 ರಷ್ಟಿತ್ತು, ಇದು 2024 ರಲ್ಲಿ 0.75 ಆಗುವ ಮೂಲಕ ಸ್ವಲ್ಪ ಹೆಚ್ಚಾಗಿದೆ.

ಹಣದ ಆಮಿಷದ ಮೂಲಕವಾದರೂ ದೇಶದಲ್ಲಿ ಜನಸಂಖ್ಯೆ ಏರಿಕೆಯಾಗಬೇಕು ಎಂಬ ಉದ್ದೇಶವನ್ನು ಹೊಂದಿರುವ ಈ ಯೋಜನೆ ಜನಸಂಖ್ಯಾ ನೀತಿಯ ಭಾಗವಾಗಿದೆ. ಜನನ ಪ್ರಮಾಣ ಕುಸಿತ ಮತ್ತು ಪ್ರಾದೇಶಿಕ ಜನಸಂಖ್ಯೆ ಕುಸಿತದಂತಹ ಗಂಭೀರ ಸಮಸ್ಯೆಗಳನ್ನು ನಿಭಾಯಿಸುವುದು ಇದರ ಉದ್ದೇಶವಾಗಿದೆ ಎಂದು ದಕ್ಷಿಣ ಕೊರಿಯಾದ ಸರ್ಕಾರಿ ಅಧಿಕಾರಿಯೊಬ್ಬರು ಹೇಳಿದ್ದಾರೆ.

ಜಪಾನಿನಲ್ಲೂ ಇದೇ ಪರಿಸ್ಥಿತಿ

ದಕ್ಷಿಣ ಕೊರಿಯಾ ದೇಶದಲ್ಲಿ ಮಾತ್ರ ಈ ಸಮಸ್ಯೆ ಅಂದುಕೊಳ್ಳಬೇಡಿ. ಜಪಾನ್ ಕೂಡ ಜನಸಂಖ್ಯಾ ಬಿಕ್ಕಟ್ಟನ್ನು ಅನುಭವಿಸುತ್ತಿದೆ. ಜಪಾನಿನ ಜನನ ಪ್ರಮಾಣವು ವರ್ಷಕ್ಕೆ 50 ಲಕ್ಷವಿತ್ತು. ಆದರೀಗ ಅದು ಕೇವಲ 7ಲಕ್ಷ 60 ಸಾವಿರಕ್ಕೆ ದಾಖಲೆಯ ಇಳಿಕೆ ಕಂಡಿದೆ. ಇದನ್ನು ಗಮನಿಸಿರುವ ಜಪಾನ್‌ ಸರ್ಕಾರ, 2035ಕ್ಕೂ ಮೊದಲು ದೇಶದ ಜನಸಂಖ್ಯಾ ಸಮಸ್ಯೆಯನ್ನು ನಿಭಾಯಿಸುವ ನಿರ್ಧಾರವನ್ನು ಕೈಗೊಂಡಿದೆ. ಅದಕ್ಕಾಗಿಯೇ ಜಪಾನ್ ಸರ್ಕಾರ, ಮದುವೆ ಆಗುವಂತೆ, ಮಕ್ಕಳನ್ನು ಪಡೆಯುವಂತೆ ಅಲ್ಲಿನ ಯುವಕರನ್ನು ಪ್ರೋತ್ಸಾಹಿಸುತ್ತಿದೆ.