ಬಹ್ರೇನ್‌ನಲ್ಲಿ ಗೋವಾ ಪ್ರವಾಸೋದ್ಯಮದಿಂದ ರೋಡ್ ಶೋ

ಗೋವಾ ಪ್ರವಾಸೋದ್ಯಮ ಇಲಾಖೆಯು ಗಲ್ಫ್ ಪ್ರದೇಶದಲ್ಲಿ ಪ್ರವಾಸಿಗರನ್ನು ಆಕರ್ಷಿಸುವ ಉದ್ದೇಶದಿಂದ ನವೆಂಬರ್ 23ರಂದು ಬಹ್ರೇನ್‌ನಲ್ಲಿ ವಿಶೇಷ ರೋಡ್‌ ಶೋ ಆಯೋಜಿಸಲು ಮುಂದಾಗಿದೆ. ಗಲ್ಫ್ ಪ್ರವಾಸೋದ್ಯಮ ಮಾರುಕಟ್ಟೆಯು ಭಾರತಕ್ಕೆ ಮಹತ್ವದ್ದಾಗಿ ಪರಿಗಣಿಸಲ್ಪಡುತ್ತಿದ್ದು, ಈ ರೋಡ್‌ಶೋ ಗೋವಾದ ಪ್ರವಾಸೋದ್ಯಮಕ್ಕೆ ಹೊಸ ಅವಕಾಶಗಳನ್ನು ತೆರೆಯುವ ವಿಶ್ವಾಸವನ್ನು ಇಲಾಖೆ ವ್ಯಕ್ತಪಡಿಸಿದೆ.

ಬಹ್ರೇನ್‌ನಲ್ಲಿ ನಡೆಯುವ ಈ ರೋಡ್‌ ಶೋನಲ್ಲಿ “Feels like Goa” ಎಂಬ ಅಭಿಯಾನವನ್ನು ಗೋವಾ ಪ್ರವಾಸೋದ್ಯಮ ಇಲಾಖೆ ನಡೆಸಲು ಸಿದ್ಧತೆಗಳನ್ನು ಕೈಗೊಂಡಿದೆ. ಗೋವಾ ರಾಜ್ಯದ ಹೊಸ ಪ್ರವಾಸೋದ್ಯಮ ಪರಿಕಲ್ಪನೆಗಳನ್ನು ಗಲ್ಫ್ ಮಾರುಕಟ್ಟೆಗೆ ಪರಿಚಯಿಸುವುದು ಈ ಅಭಿಯಾನದ ಮುಖ್ಯ ಗುರಿಯಾಗಿದೆ.

ಈ ಕಾರ್ಯಕ್ರಮದಲ್ಲಿ Nocto Tourism (ಸುರಕ್ಷಿತ ನೈಟ್‌ಲೈಫ್ ಕೇಂದ್ರಿತ ಪ್ರವಾಸ), Jet-Setting (ಚಿತ್ರರಂಗ ಮತ್ತು ಸಿನೆಮಾ-ಪ್ರೇರಿತ ಪ್ರವಾಸ) ಮತ್ತು CalmCation (ಆರೋಗ್ಯ–ನೆಮ್ಮದಿಯ ಅನುಭವಗಳನ್ನು ನೀಡುವ ಪ್ರವಾಸ) ಎಂಬ ಮೂರು ಹೊಸ ಪ್ರವಾಸೋದ್ಯಮ ಪ್ರವೃತ್ತಿಗಳನ್ನು ಗೋವಾ ಪ್ರಚಾರಿಸಲು ಯೋಜನೆಗಳನ್ನು ರೂಪಿಸಿದೆ.

ಗೋವಾ ಪ್ರವಾಸೋದ್ಯಮ ನಿರ್ದೇಶಕ ಕೆದರ್ ನಾಯಕ್ ಮಾತನಾಡಿ, “ಗಲ್ಫ್ ಪ್ರದೇಶದ ಪ್ರವಾಸಿಗರು ಗುಣಮಟ್ಟ ಮತ್ತು ವೈವಿಧ್ಯತೆಯನ್ನು ಅಪೇಕ್ಷಿಸುತ್ತಾರೆ; ಅವರ ಅಪೇಕ್ಷೆಗಳನ್ನು ಗೋವಾ ರಾಜ್ಯವು ಪೂರೈಸಲು ಸಮರ್ಥವಾಗಿದೆ. ಬಹ್ರೇನ್ ರೋಡ್‌ಶೋ ನಮಗೆ ಆ ಮಾರುಕಟ್ಟೆಯೊಂದಿಗೆ ನೇರ ಸಂಪರ್ಕ ಸಾಧಿಸಲು ಸಹಾಯ ಮಾಡುತ್ತದೆ” ಎಂದು ತಿಳಿಸಿದರು.