ಕೃಷಿ ಪ್ರವಾಸೋದ್ಯಮ: ಪ್ರಕೃತಿಯ ಮಡಿಲಿಗೆ ಒಂದು ಪಯಣ

- ಹೊಸ್ಮನೆ ಮುತ್ತು

ನಗರದ ವೇಗದ ಜೀವನಶೈಲಿ, ಗದ್ದಲ ಮತ್ತು ತಂತ್ರಜ್ಞಾನದ ಅತಿಯಾದ ಒತ್ತಡದಲ್ಲಿ ಸಿಲುಕಿರುವ ಇಂದಿನ ಮನುಷ್ಯ ಪ್ರಕೃತಿಯ ಸಹಜ ಸೌಂದರ್ಯದಿಂದ ದೂರವಾಗುತ್ತಿದ್ದಾನೆ. ದಿನನಿತ್ಯದ ಟ್ರಾಫಿಕ್ ಹಾಗೂ ಮೊಬೈಲ್ ಸ್ಕ್ರೀನ್‌ಗಳ ಅಬ್ಬರದ ನಡುವೆ, ಆತ ಶಾಂತಿ, ಶುದ್ಧ ಗಾಳಿ, ಹಸಿರು ಪರಿಸರ, ನೈಸರ್ಗಿಕ ಆಹಾರ ಮತ್ತು ಹಳ್ಳಿಯ ಸರಳ ಬದುಕಿನ ನೆಮ್ಮದಿಗಾಗಿ ಹಂಬಲಿಸುತ್ತಿದ್ದಾನೆ. ಈ ಹಂಬಲದ ಫಲವಾಗಿ ಹುಟ್ಟಿಕೊಂಡ ಹೊಸ ಪರಿಕಲ್ಪನೆಯೇ 'ಕೃಷಿ ಪ್ರವಾಸೋದ್ಯಮ' (Agri-Tourism).

ಇದನ್ನೂ ಓದಿ: ಪ್ರವಾಸಿಯಾಗಿ ಹೋಗಿ ರೈತರಾಗಿ ಬನ್ನಿ!

ಇದು ಕೇವಲ ಒಂದು ಪ್ರವಾಸವಲ್ಲ; ಬದಲಾಗಿ ನಗರವಾಸಿಗಳನ್ನು ನೇರವಾಗಿ ಮಣ್ಣಿನ ಬೇರುಗಳಿಗೆ ಮತ್ತು ನಮ್ಮ ಆಹಾರದ ಮೂಲಕ್ಕೆ ಕೊಂಡೊಯ್ಯುವ ಭವ್ಯ ಸಾಂಸ್ಕೃತಿಕ ಹಾಗೂ ಆರ್ಥಿಕ ಸೇತುವೆಯಾಗಿದೆ. ಹಳ್ಳಿಯ ನಿಶ್ಶಬ್ದತೆ, ಹಕ್ಕಿಗಳ ಚಿಲಿಪಿಲಿ, ಹಸಿರು ಹೊಲಗಳ ನಡುವೆ ರೈತನ ಶ್ರಮವನ್ನು ಹತ್ತಿರದಿಂದ ಕಂಡು, ಬದುಕಿನ ಮೂಲವಾದ ಕೃಷಿಯನ್ನು ಅರಿಯುವ, ಅನುಭವಿಸುವ ಹಾಗೂ ಗೌರವಿಸುವ ಒಂದು ಸಾರ್ಥಕ ಪಯಣ. ಇದು ಗ್ರಾಮೀಣ ಭಾರತದ ಸಹಜ ಲಯದೊಂದಿಗೆ ಸಾಂಸ್ಕೃತಿಕ ಸಂವಾದ ನಡೆಸುವ ಒಂದು ಅತ್ಯುತ್ತಮ ಅವಕಾಶವಾಗಿದೆ.

ಏನಿದು ಕೃಷಿ ಪ್ರವಾಸೋದ್ಯಮ?

ಸರಳವಾಗಿ ಹೇಳುವುದಾದರೆ, ರೈತರು ಮತ್ತು ಪ್ರವಾಸಿಗರನ್ನು ಬೆಸೆಯುವ ಒಂದು ನವೀನ ಪರಿಕಲ್ಪನೆ. ಇಲ್ಲಿ ರೈತರು ತಮ್ಮ ದೈನಂದಿನ ಕೃಷಿ ಚಟುವಟಿಕೆಗಳನ್ನು ಪ್ರವಾಸಿಗರಿಗೆ ಮುಕ್ತವಾಗಿ ತೆರೆದಿಡುವ ಮೂಲಕ, ಅವರಿಗೆ ಹಳ್ಳಿಯ ಜೀವನಶೈಲಿ, ವೈವಿಧ್ಯಮಯ ಕೃಷಿ ವಿಧಾನಗಳು, ಗ್ರಾಮೀಣ ಸಂಸ್ಕೃತಿ ಮತ್ತು ನೈಸರ್ಗಿಕ ಪರಿಸರವನ್ನು ನೇರವಾಗಿ ಅನುಭವಿಸಲು ಅವಕಾಶ ಮಾಡಿಕೊಡುತ್ತಾರೆ. ಈ ವ್ಯವಸ್ಥೆಯಲ್ಲಿ ಪ್ರವಾಸಿಗರು ಕೇವಲ ಪ್ರೇಕ್ಷಕರಾಗಿರದೆ, ಕೃಷಿ ಭೂಮಿಗಳಲ್ಲಿ (ಫಾರ್ಮ್ ಸ್ಟೇ) ತಂಗುತ್ತಾ ರೈತನ ದೈನಂದಿನ ಬದುಕಿನ ಭಾಗವಾಗುತ್ತಾರೆ.

ಮಣ್ಣಿನ ಸೊಗಡಿನ ಒಂದು ಅನನ್ಯ ಅನುಭವ

ಕೃಷಿ ಪ್ರವಾಸೋದ್ಯಮವು ಕೇವಲ ಪ್ರೇಕ್ಷಣೀಯ ಸ್ಥಳಗಳನ್ನು ವೀಕ್ಷಿಸುವ ಪ್ರವಾಸವಲ್ಲ; ಬದಲಾಗಿ 'ಅನುಭವ ಮತ್ತು ಸಂವೇದನೆಗಳ' ಮೂಲಕ ಮಣ್ಣಿನ ಗುಣವನ್ನು ಅರಿಯುವ ವಿಶಿಷ್ಟ ಪ್ರಯತ್ನವಾಗಿದೆ. ಇಲ್ಲಿ ಪ್ರವಾಸಿಗರು ಕೃಷಿಕರೊಂದಿಗೆ ಮಣ್ಣಿನ ಮಕ್ಕಳಾಗಿ ಬೆರೆತು ಬಿತ್ತನೆ ಮಾಡುವುದು, ಸಸಿ ನೆಡುವುದು, ಬೆಳೆ ಕಟಾವು ಮಾಡುವುದು, ಹಸುಗಳ ಹಾಲು ಹಿಂಡುವುದು ಮತ್ತು ಜೇನು ಸಾಕಣೆಯಂಥ ದೈನಂದಿನ ಕೃಷಿ ಕಾರ್ಯಗಳಲ್ಲಿ ಸಕ್ರಿಯವಾಗಿ ಪಾಲ್ಗೊಳ್ಳಬಹುದು. ಇದರೊಂದಿಗೆ ಎತ್ತಿನ ಗಾಡಿಯ ಸವಾರಿ, ನೇಗಿಲು ಹಿಡಿಯುವುದು, ರಾಗಿ ಬೀಸುವುದು ಹಾಗೂ ಭತ್ತ ಕುಟ್ಟುವಂಥ ಸಾಂಪ್ರದಾಯಿಕ ಗ್ರಾಮೀಣ ಅನುಭವಗಳನ್ನು ಪಡೆಯಬಹುದು. ಕುಂಬಾರಿಕೆ, ಮಗ್ಗದ ನೇಯ್ಗೆ, ಬಿದಿರಿನ ಬುಟ್ಟಿ ಹೆಣೆಯುವುದು, ಮೀನುಗಾರಿಕೆ ಮತ್ತು ಆಲೆಮನೆಯಲ್ಲಿ ಬೆಲ್ಲ ತಯಾರಿಸುವ ಪ್ರಕ್ರಿಯೆಯಂಥ ನೈಜ ಕಸುಬುಗಳ ಪರಿಚಯ ಇಲ್ಲಿ ಲಭ್ಯವಾಗುತ್ತದೆ.

ಆಹಾರ, ಕಲೆ ಮತ್ತು ಸಾಂಪ್ರದಾಯಿಕ ಆಟಗಳು

ಇಲ್ಲಿನ ಮತ್ತೊಂದು ಆಕರ್ಷಣೆಯೆಂದರೆ ಆಹಾರ ಪದ್ಧತಿ. ಮಣ್ಣಿನ ಒಲೆಯ ಮೇಲೆ ತಯಾರಿಸಿದ ಬಿಸಿ ರೊಟ್ಟಿ, ರಾಗಿ ಮುದ್ದೆ, ತೊಡದೇವು ಹಾಗೂ ಹೊಲದ ತಾಜಾ ತರಕಾರಿಗಳ ಸಾವಯವ ಆಹಾರದ ಸವಿಯೊಂದಿಗೆ ಗ್ರಾಮೀಣ ಸೊಗಡಿನ ಪಾನೀಯಗಳು ಇಲ್ಲಿನ ವಿಶೇಷ. ಇದರ ಜತೆಗೆ ಜನಪದ ಕಲೆ, ಸಂಗೀತ, ನೃತ್ಯ ಮತ್ತು ಹಳ್ಳಿಯ ಹಬ್ಬ-ಹರಿದಿನಗಳ ಸಡಗರದ ಸವಿ ಉಣ್ಣಬಹುದು. ಚಿನ್ನಿ-ದಾಂಡು, ಲಗೋರಿ, ಬುಗುರಿ, ಕೆಸರು ಗದ್ದೆ ಓಟ, ಕೋಳಿ ಅಂಕ ಹಾಗೂ ಕಂಬಳದಂಥ ಸಾಂಪ್ರದಾಯಿಕ ಆಟಗಳು ಪ್ರವಾಸಿಗರಿಗೆ ಬಾಲ್ಯದ ನೆನಪುಗಳನ್ನು ಮರುಕಳಿಸುವುದರ ಜತೆಗೆ ಹೊಸ ಚೈತನ್ಯ ನೀಡುತ್ತವೆ. ವಿಶೇಷವಾಗಿ ಮಕ್ಕಳಿಗೆ ಈ ಪ್ರವಾಸವು ಒಂದು ಪ್ರಾಯೋಗಿಕ ಪಾಠಶಾಲೆಯಿದ್ದಂತೆ. ನಿಸರ್ಗದ ಮಡಿಲಲ್ಲಿ ಆಹಾರ ಉತ್ಪಾದನೆ ಮತ್ತು ರೈತನ ಶ್ರಮಜೀವನವನ್ನು ಅವರು ಪ್ರತ್ಯಕ್ಷವಾಗಿ ಕಂಡು ಕಲಿಯಲು ಇಲ್ಲಿ ಅಪೂರ್ವವಾದ ಅವಕಾಶಗಳಿವೆ. ತರಕಾರಿಗಳು ಕೇವಲ ಸೂಪರ್ ಮಾರ್ಕೆಟ್ ಅಥವಾ ಮಾಲ್‌ಗಳಿಂದ ಬರುವುದಿಲ್ಲ, ಅವು ರೈತನ ಬೆವರಿನಿಂದ ಮಣ್ಣಿನಲ್ಲಿ ಬೆಳೆಯುತ್ತವೆ ಎಂಬ ಜೀವನದ ದೊಡ್ಡ ಸತ್ಯದ ಅರಿವು ಅವರಿಗೆ ಇಲ್ಲಿ ಆಗುತ್ತದೆ.

ಕೃಷಿ ಪ್ರವಾಸೋದ್ಯಮದ ಮಹತ್ವ

ಗ್ರಾಮೀಣಾಭಿವೃದ್ಧಿಯ ಹೊಸ ಪಥ: ಇಂದಿನ ದಿನಗಳಲ್ಲಿ ಹವಾಮಾನ ವೈಪರೀತ್ಯ ಮತ್ತು ಬೆಲೆ ಕುಸಿತದಿಂದಾಗಿ ಕೇವಲ ಬೆಳೆಗಳನ್ನು ನಂಬಿ ಜೀವನ ಸಾಗಿಸುವುದು ರೈತರಿಗೆ ದೊಡ್ಡ ಸವಾಲಾಗಿದೆ. ಕೃಷಿ ಆದಾಯದ ಅನಿಶ್ಚಿತತೆಯ ನಡುವೆ, ಕೃಷಿ ಪ್ರವಾಸೋದ್ಯಮವು ರೈತರಿಗೆ ಸುಸ್ಥಿರ ಮತ್ತು ಭರವಸೆಯ ಪರ್ಯಾಯ ಆದಾಯದ ಮಾರ್ಗವಾಗಿ ಹೊರಹೊಮ್ಮಿದೆ. ಕೃಷಿಯೊಂದಿಗೆ ಪ್ರವಾಸೋದ್ಯಮವನ್ನು ಮೈಗೂಡಿಸಿಕೊಳ್ಳುವುದು ಗ್ರಾಮೀಣ ಆರ್ಥಿಕ ಬಲವರ್ಧನೆಗೆ ಮತ್ತು ರೈತರ ಆರ್ಥಿಕ ಸಬಲೀಕರಣಕ್ಕೆ ಭದ್ರವಾದ ಅಡಿಪಾಯ ಹಾಕುತ್ತದೆ. ಈ ವ್ಯವಸ್ಥೆಯಲ್ಲಿ ಪ್ರವಾಸಿಗರು ನೇರವಾಗಿ ಹೊಲಗಳಿಗೆ ಭೇಟಿ ನೀಡುವುದರಿಂದ, ರೈತರು ತಮ್ಮ ಬೆಳೆಗಳನ್ನು ಮಧ್ಯವರ್ತಿಗಳ ಹಸ್ತಕ್ಷೇಪವಿಲ್ಲದೆ ನೇರವಾಗಿ ಗ್ರಾಹಕರಿಗೆ ಮಾರಾಟ ಮಾಡಿ ಉತ್ತಮ ಬೆಲೆ ಪಡೆಯಬಹುದು. ಇದಲ್ಲದೆ, ಸ್ಥಳೀಯ ಯುವಕರಿಗೆ ಹಳ್ಳಿಗಳಲ್ಲೇ ಗೈಡ್‌ಗಳಾಗಿ ಅಥವಾ ವ್ಯವಸ್ಥಾಪಕರಾಗಿ ಉದ್ಯೋಗಾವಕಾಶಗಳು ಸೃಷ್ಟಿಯಾಗಿ, ನಗರಗಳಿಗೆ ವಲಸೆ ಹೋಗುವ ಪ್ರಮಾಣ ಗಣನೀಯವಾಗಿ ಕಡಿಮೆಯಾಗುತ್ತದೆ. ಒಟ್ಟಾರೆಯಾಗಿ, ಕೃಷಿ ಪ್ರವಾಸೋದ್ಯಮವು 'ಆತ್ಮನಿರ್ಭರ ಕೃಷಿ ವ್ಯವಸ್ಥೆ'ಯನ್ನು ನಿರ್ಮಿಸುವಲ್ಲಿ ಒಂದು ಭರವಸೆಯ ಹಾದಿಯಾಗಿದೆ.

ಪರಿಸರ ಸ್ನೇಹಿ ಪಯಣ ಮತ್ತು ಸಾಂಸ್ಕೃತಿಕ ಸಂರಕ್ಷಣೆ: ಇದು ಪ್ರಕೃತಿ ಸಂರಕ್ಷಣೆಯ ಆಶಯದೊಂದಿಗೆ ಸಾಗುವ ಜವಾಬ್ದಾರಿಯುತ ಪಯಣ. ಕಡಿಮೆ ಮಾಲಿನ್ಯದೊಂದಿಗೆ ನೈಸರ್ಗಿಕ ಸಂಪನ್ಮೂಲಗಳನ್ನು ಗೌರವಿಸುವುದು ಮತ್ತು ಸಾವಯವ ಕೃಷಿಯನ್ನು ಉತ್ತೇಜಿಸುವುದು ಇದರ ಮೂಲ ಉದ್ದೇಶ. ಕೃಷಿ ಪ್ರವಾಸೋದ್ಯಮವು ಹಳ್ಳಿಗಳ ಸಂಪ್ರದಾಯ, ಜಾನಪದ ಕಲೆ ಹಾಗೂ ವಿಶಿಷ್ಟ ಸಾಂಸ್ಕೃತಿಕ ಪದ್ಧತಿಗಳನ್ನು ಉಳಿಸಿ ಬೆಳೆಸಲು ಪೂರಕವಾಗಿದೆ. ಇದು ನಗರ ಮತ್ತು ಗ್ರಾಮೀಣ ಜನತೆಯ ನಡುವಿನ ಅಂತರವನ್ನು ಕಡಿಮೆ ಮಾಡಿ, ಪರಸ್ಪರ ಗೌರವವನ್ನು ಬೆಳೆಸುತ್ತದೆ.

ಭಾರತ ಮತ್ತು ಕರ್ನಾಟಕದ ಕೃಷಿ ಪ್ರವಾಸೋದ್ಯಮದ ಅವಲೋಕನ: ಭಾರತದಂಥ ಕೃಷಿ ಪ್ರಧಾನ ದೇಶದಲ್ಲಿ ಈ ಕ್ಷೇತ್ರವು ಅತ್ಯಂತ ವೇಗವಾಗಿ ಬೆಳೆಯುತ್ತಿದೆ. ಮಹಾರಾಷ್ಟ್ರದ ದ್ರಾಕ್ಷಿ ತೋಟಗಳು, ಕೇರಳದ ತೆಂಗು ಮತ್ತು ಮಸಾಲೆ ತೋಟಗಳು ಹಾಗೂ ಹಿಮಾಚಲದ ಸೇಬಿನ ತೋಟಗಳು ಈಗಾಗಲೇ ಜಾಗತಿಕ ಮಟ್ಟದಲ್ಲಿ ಪ್ರವಾಸಿಗರನ್ನು ಸೆಳೆಯುತ್ತಿವೆ. ಕರ್ನಾಟಕವು ಕೂಡಾ ತನ್ನ ವೈವಿಧ್ಯಮಯ ಭೂಪ್ರದೇಶ ಮತ್ತು ವಿಶಿಷ್ಟ ಸಂಸ್ಕೃತಿಯಿಂದಾಗಿ ಕೃಷಿ ಪ್ರವಾಸೋದ್ಯಮಕ್ಕೆ ಅತ್ಯಂತ ಸೂಕ್ತವಾದ ರಾಜ್ಯವಾಗಿದೆ. ಕೊಡಗಿನ ಕಾಫಿ ತೋಟಗಳು, ಮಲೆನಾಡಿನ ಏಲಕ್ಕಿ, ಕಬ್ಬು ಮತ್ತು ಅಡಕೆ ತೋಟಗಳು ಪ್ರವಾಸಿಗರಿಗೆ ಹಚ್ಚ ಹಸಿರಿನ ಅನುಭವ ನೀಡುತ್ತವೆ. ಉತ್ತರ ಕರ್ನಾಟಕದ ದ್ರಾಕ್ಷಿ, ಜೋಳ ಮತ್ತು ದಾಳಿಂಬೆ ತೋಟಗಳು, ಬೆಂಗಳೂರು ಗ್ರಾಮಾಂತರದ ಹೂವಿನ ಹಾಗೂ ಹುಣಸೆ ತೋಟಗಳು, ರೇಷ್ಮೆ ಕೃಷಿ, ಮತ್ತು ರಾಗಿ ಹೊಲಗಳು ಪ್ರವಾಸಿಗರಿಗೆ ಕೃಷಿ ಪದ್ಧತಿಗಳ ನಿಕಟ ಪರಿಚಯ ಮಾಡಿಕೊಡುತ್ತವೆ. ಆಧುನಿಕತೆಯ ಸ್ಪರ್ಶವಾಗಿ ಸೌರ ವಿದ್ಯುತ್ ಉತ್ಪಾದನಾ ಫಾರ್ಮ್‌ಗಳು ಸಹ ಇಂದು ಪ್ರವಾಸಿಗರ ಕುತೂಹಲ ಕೆರಳಿಸುತ್ತಿವೆ.

ಸವಾಲುಗಳು ಮತ್ತು ಅವಕಾಶಗಳು: ಗ್ರಾಮೀಣ ಪ್ರವಾಸೋದ್ಯಮದ ಬೆಳವಣಿಗೆಗೆ ಹಲವು ಸವಾಲುಗಳಿದ್ದರೂ, ಅದರೊಂದಿಗೆ ಅಪಾರ ಅವಕಾಶಗಳೂ ತೆರೆದುಕೊಂಡಿವೆ. ಗುಣಮಟ್ಟದ ರಸ್ತೆಗಳು, ಶುದ್ಧ ಕುಡಿಯುವ ನೀರು ಮತ್ತು ನೈರ್ಮಲ್ಯದಂಥ ಮೂಲಭೂತ ಸೌಕರ್ಯಗಳ ಕೊರತೆಯು ಈ ಕ್ಷೇತ್ರದ ಅಭಿವೃದ್ಧಿಗೆ ಪ್ರಮುಖ ಹಿನ್ನಡೆಯಾಗಿ ಪರಿಣಮಿಸಿದೆ. ಆತಿಥ್ಯ, ಸುರಕ್ಷತಾ ಕ್ರಮಗಳು ಮತ್ತು ಮಾರುಕಟ್ಟೆ ಕೌಶಲ್ಯಗಳ ಬಗ್ಗೆ ಸ್ಥಳೀಯರಲ್ಲಿ ಸೂಕ್ತ ತರಬೇತಿಯ ಕೊರತೆಯಿದೆ. ಸ್ಥಳೀಯ ಸಮುದಾಯಗಳಲ್ಲಿ ಜಾಗೃತಿ ಮತ್ತು ಸಕ್ರಿಯ ಭಾಗವಹಿಸುವಿಕೆ ಇಲ್ಲದಿರುವುದು ಈ ಕ್ಷೇತ್ರದ ಪ್ರಗತಿಯನ್ನು ಕುಂಠಿತಗೊಳಿಸಿದೆ. ಇವೆಲ್ಲದರ ಜತೆಗೆ, ಡಿಜಿಟಲ್ ಮಾರ್ಕೆಟಿಂಗ್ ಮತ್ತು ಆಕರ್ಷಕ ಪ್ರವಾಸಿ ಪ್ಯಾಕೇಜುಗಳ ಮೂಲಕ ಸರಿಯಾದ ಪ್ರಚಾರ ಸಿಗದಿರುವುದು ಮಾರುಕಟ್ಟೆಯ ವಿಸ್ತರಣೆಗೆ ಹಿನ್ನಡೆಯಾಗಿದೆ. ಇಷ್ಟೆಲ್ಲಾ ಸವಾಲುಗಳ ನಡುವೆಯೂ, ನಗರವಾಸಿಗಳಲ್ಲಿ ಹೆಚ್ಚುತ್ತಿರುವ 'ಗ್ರಾಮೀಣ ಅನುಭವ'ದ ಬೇಡಿಕೆ ಮತ್ತು ಈ ಕ್ಷೇತ್ರಕ್ಕೆ ಹರಿದುಬರುತ್ತಿರುವ ಖಾಸಗಿ ಹೂಡಿಕೆಗಳು ಪ್ರವಾಸೋದ್ಯಮದ ವಿಸ್ತರಣೆಗೆ ಹೊಸ ಭರವಸೆಯ ದಾರಿಗಳನ್ನು ತೆರೆಯುತ್ತಿವೆ.

ರೈತ ದೇಶದ ಬೆನ್ನೆಲುಬು ಎಂಬ ಮಾತು ಕೇವಲ ಘೋಷಣೆಯಾಗದೆ ಸಾರ್ಥಕವಾಗಬೇಕಾದರೆ, ನಾವು ಜವಾಬ್ದಾರಿಯುತ ನಾಗರಿಕರಾಗಿ ಇಂಥ ಪ್ರಯತ್ನಗಳನ್ನು ಬೆಂಬಲಿಸಬೇಕಿದೆ. ಮುಂದಿನ ಬಾರಿ ನೀವು ಪ್ರವಾಸದ ಯೋಜನೆ ಮಾಡುವಾಗ, ಒಂದು ಕೃಷಿ ಹಸಿರು ಮನೆಗೆ ಭೇಟಿ ನೀಡಿ. ಆ ಅನುಭವವು ನಿಮ್ಮನ್ನು ಬಾಹ್ಯ ಪ್ರಪಂಚಕ್ಕೆ ಮಾತ್ರವಲ್ಲದೆ, ನಿಮ್ಮ ಒಳಗಿರುವ ಮಣ್ಣಿನ ಬೇರುಗಳಿಗೂ ಹತ್ತಿರವಾಗಿಸುತ್ತದೆ. ನೆನಪಿಡಿ; ಕೃಷಿ ಸಂಸ್ಕೃತಿ ಉಳಿದರೆ ಮಾತ್ರ ನಮಗೆ ಸುಸ್ಥಿರ ಭವಿಷ್ಯ ಸಾಧ್ಯ.

ಇತ್ತೀಚೆಗೆ ಜಿಕೆವಿಕೆ ಆವರಣದಲ್ಲಿ ನಡೆದ ಕೃಷಿ ಮೇಳದಲ್ಲಿ ನಗರ ವಾಸಿಗಳಿಗೆ ಕೃಷಿ ಪ್ರವಾಸೋದ್ಯಮವನ್ನು ಪರಿಚಯಿಸುವ ಉದ್ದೇಶದಿಂದ ರೂಪಿಸಿದ ‘ಅಗ್ರಿ ಟೂರಿಸಂ ಮಾದರಿ’ ಗಮನಸೆಳೆದಿತ್ತು. ಇದೇ ರೀತಿ ಇತ್ತೀಚೆಗೆ ಯಲಹಂಕ ತಾಲೂಕಿನ ನಾಗದಾಸನಹಳ್ಳಿಯ ಫಾರ್ಮ್’ ಒಂದರಲ್ಲಿ ಹಮ್ಮಿಕೊಂಡಿದ್ದ ‘ದಾಳಿಂಬೆ ಫಾರ್ಮ್ ಟೂರಿಸಂ’ ಎಂಬ ಹೊಸ ಪರಿಕಲ್ಪನೆಗೆ ನಾಗರಿಕರಿಂದ ಅಭೂತಪೂರ್ವ ಸ್ಪಂದನೆ ವ್ಯಕ್ತವಾಗಿತ್ತು.

ಉತ್ತರ ಪ್ರದೇಶದ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್ ಅವರು ರಾಜ್ಯದ ಹಳ್ಳಿಗಳನ್ನು ಪ್ರವಾಸೋದ್ಯಮ ಕೇಂದ್ರಗಳಾಗಿ ಪರಿವರ್ತಿಸುವ ಅದ್ಭುತ ಪರಿಕಲ್ಪನೆಗೆ ಅಡಿಗಲ್ಲು ಇಟ್ಟಿದ್ದಾರೆ. ಈ ಉಪಕ್ರಮವು ಕೃಷಿ ಪ್ರವಾಸೋದ್ಯಮವನ್ನು ಉತ್ತೇಜಿಸುತ್ತದೆ, ಪ್ರವಾಸಿಗರಿಗೆ ಗ್ರಾಮೀಣ ಜೀವನಶೈಲಿ, ಸಂಸ್ಕೃತಿ, ಮತ್ತು ಕೃಷಿ ಚಟುವಟಿಕೆಗಳಲ್ಲಿ ತೊಡಗಿಕೊಳ್ಳಲು ಅವಕಾಶ ನೀಡುತ್ತದೆ.

ಈ ಯೋಜನೆಯಡಿಯಲ್ಲಿ, ಹಳ್ಳಿಗಳಲ್ಲಿ ಹೋಮ್‌ಸ್ಟೇ ಮಾದರಿಯ ಫಾರ್ಮ್‌ಸ್ಟೇಗಳನ್ನು ನಿರ್ಮಿಸಲಾಗುತ್ತದೆ. ಇದು ರೈತರು ಮತ್ತು ಗ್ರಾಮೀಣ ಸಮುದಾಯಗಳಿಗೆ ಹೆಚ್ಚುವರಿ ಆದಾಯದ ಮೂಲವನ್ನು ಒದಗಿಸುತ್ತದೆ. ಸರಕಾರವೇ ಮುಂದೆ ನಿಂತು ಇಂಥದ್ದೊಂದು ಪ್ರವಾಸೋದ್ಯಮವನ್ನು ಅಭಿವೃದ್ಧಿಪಡಿಸಿದರೆ ಗ್ರಾಮೀಣ ಪ್ರದೇಶಗಳಲ್ಲಿ ಎಂಥ ದೊಡ್ಡ ಬದಲಾವಣೆ ಆದೀತು! ಈ ಯೋಜನೆಯು ಇಡೀ ದೇಶಕ್ಕೆ ಮಾದರಿಯಾಗಬಲ್ಲ ಕ್ರಾಂತಿಕಾರಿ ಪರಿಕಲ್ಪನೆಯಾಗಿದೆ, ಇದು ಗ್ರಾಮೀಣ ಪ್ರದೇಶಗಳ ಅಭಿವೃದ್ಧಿಗೆ ಮತ್ತು ಪ್ರವಾಸಿಗರಿಗೆ ವಿಶಿಷ್ಟ ಅನುಭವ ನೀಡಲು ಸಹಾಯ ಮಾಡುತ್ತದೆ. ಈ ಯೋಜನೆಯ ಮೂಲಕ, ವಿದೇಶಿ ಪ್ರವಾಸಿಗರನ್ನು ಆಕರ್ಷಿಸುವುದು ಮತ್ತು ಭಾರತದ ಗ್ರಾಮೀಣ ಸಂಸ್ಕೃತಿಯನ್ನು ಪರಿಚಯಿಸುವುದು ಸುಲಭವಾಗುತ್ತದೆ.