ಭಗವಾನ್ ಶ್ರೀಕೃಷ್ಣ ದೇಹತ್ಯಾಗ ಮಾಡಿದ ಪವಿತ್ರ ಸ್ಥಳ

ಗುಜರಾತಿನ ಸೋಮನಾಥ ಜ್ಯೋತಿರ್ಲಿಂಗದ ಸಮೀಪದಲ್ಲಿರುವ ಭವ್ಯವಾದ ದೇವಾಲಯ ಭಾಲ್ಕ ತೀರ್ಥ. ಶತಮಾನಗಳಿಂದಲೂ ಐತಿಹಾಸಿಕ ಮತ್ತು ಧಾರ್ಮಿಕ ಮಹತ್ವವನ್ನು ಹೊಂದಿರುವ ಈ ದೇವಾಲಯವು ಭಗವಾನ್ ಕೃಷ್ಣನು ತನ್ನ ಅಂತಿಮ ಕ್ಷಣಗಳನ್ನು ಭೂಮಿಯ ಮೇಲೆ ಕಳೆದ ಸ್ಥಳವೆಂದು ಗುರುತಿಸಿಕೊಂಡಿದೆ.

ಭಾಲ್ಕ ತೀರ್ಥದಲ್ಲಿರುವ ದೇವಾಲಯವನ್ನು ಮಹಾಪ್ರಭುಜಿಯ ಬೇತಕ್ ಎಂದು ಕರೆಯಲಾಗುತ್ತದೆ ಮತ್ತು ಶ್ರೀಕೃಷ್ಣನ ಗೌರವಾರ್ಥವಾಗಿ ತುಳಸಿ ಗಿಡವನ್ನು ನೆಡಲಾಗಿದೆ. ಮರಳುಗಲ್ಲಿನಲ್ಲಿ ನಿರ್ಮಿಸಲಾದ ಅದ್ಭುತವಾದ ಕೃಷ್ಣ ದೇವಾಲಯದ ಅಂಗಳದಲ್ಲಿ ಆಲದ ಮರಗಳು ಸುತ್ತುವರಿದಿವೆ. ಸುಂದರ ಕೆತ್ತನೆಯ ಕಂಬಗಳಿವೆ. ಒಂದು ಸುಂದರ ಕೊಳವೂ ಇದೆ. ದೇಗುಲದ ಒಳಗೆ ಅರ್ಧ ಒರಗಿರುವ ಭಂಗಿಯಲ್ಲಿರುವ ಸುಂದರವಾದ ಶ್ರೀಕೃಷ್ಣನ ವಿಗ್ರಹವು ನಮ್ಮನ್ನು ಮಂತ್ರಮುಗ್ಧಗೊಳಿಸುತ್ತದೆ. ಈ ದೇವಾಲಯವು ಕೃಷ್ಣನ ಕೊಳಲು ನುಡಿಸುವ ಸುಂದರವಾದ ತ್ರಿಭಂಗಿಯ ವಿಗ್ರಹವನ್ನೂ ಹೊಂದಿದೆ. ‌

ಭಾಲ್ಕ ತೀರ್ಥ ಸ್ಥಳ ಪುರಾಣ:

ಮಹಾಭಾರತದ ಪ್ರಕಾರ, ಕುರುಕ್ಷೇತ್ರ ಯುದ್ಧವು ಗಾಂಧಾರಿಯ ಎಲ್ಲಾ ನೂರು ಪುತ್ರರ ಮರಣಕ್ಕೆ ಕಾರಣವಾಯಿತು. ದುರ್ಯೋಧನನ ಮರಣದ ಹಿಂದಿನ ರಾತ್ರಿ, ಕೃಷ್ಣನು ಗಾಂಧಾರಿಗೆ ಸಂತಾಪ ಸೂಚಿಸಲು ಭೇಟಿ ನೀಡಿದನು. ಕೃಷ್ಣನು ತಿಳಿದೂ ಯುದ್ಧವನ್ನು ಕೊನೆಗೊಳಿಸಲಿಲ್ಲ ಎಂದು ಗಾಂಧಾರಿ ಭಾವಿಸಿದಳು ಮತ್ತು ಕೋಪ ಮತ್ತು ದುಃಖದ ಭರದಲ್ಲಿ, ಗಾಂಧಾರಿಯು ಯದುವಂಶದ ಎಲ್ಲರೊಂದಿಗೆ ಕೃಷ್ಣನು 36 ವರ್ಷಗಳ ನಂತರ ನಾಶವಾಗಲೆಂದು ಶಪಿಸುತ್ತಾಳೆ. ಕೃಷ್ಣನು ಸ್ವತಃ ಇದನ್ನು ತಿಳಿದಿದ್ದನು ಮತ್ತು ಬಯಸಿದ್ದನು. ಆದ್ದರಿಂದ ಅವನು "ತಥಾಸ್ತು" ಎಂದು ಗಾಂಧಾರಿಯ ಮಾತನ್ನು ಕೊನೆಗೊಳಿಸಿದನು.

36 ವರ್ಷಗಳ ನಂತರ, ಒಂದು ಉತ್ಸವದಲ್ಲಿ ಯಾದವರ ನಡುವೆ ಕಾಳಗ ನಡೆದು ಒಬ್ಬರನ್ನೊಬ್ಬರು ಕೊಂದರು. ಅವನ ಹಿರಿಯ ಸಹೋದರ ಬಲರಾಮ ಯೋಗದ ಮೂಲಕ ದೇಹವನ್ನು ತೊರೆದನು. ಒಂದು ಮರದ ಕೆಳಗೆ, ಕೃಷ್ಣನು ಒರಗಿಕೊಂಡು ಯೋಗ ಸಮಾಧಿಯನ್ನು ಪ್ರವೇಶಿಸಿದನು.

ಆ ಸಮಯದಲ್ಲಿ, ಜರಾ ಎಂಬ ಬೇಟೆಗಾರನು ಆ ಕಾಡಿಗೆ ಭೇಟಿ ನೀಡುತ್ತಾನೆ ಮತ್ತು ಜರಾನು ಭಾಗಶಃ ಗೋಚರಿಸುತ್ತಿದ್ದ ಕೃಷ್ಣನ ಎಡ ಪಾದವನ್ನು ಜಿಂಕೆಯೆಂದು ತಪ್ಪಾಗಿ ಭಾವಿಸಿ ಬಾಣವನ್ನು ಬಿಡುತ್ತಾನೆ. ಜರಾನು ತಕ್ಷಣ ಕೃಷ್ಣನ ಬಳಿಗೆ ಬಂದು ತನ್ನ ತಪ್ಪನ್ನು ಅರಿತು ಕ್ಷಮೆಗಾಗಿ ಭಗವಂತನನ್ನು ಪರಿಪರಿಯಾಗಿ ಬೇಡಿಕೊಳ್ಳುತ್ತಾನೆ. ಶ್ರೀಕೃಷ್ಣನು ಅವನನ್ನು ಸಾಂತ್ವನಗೊಳಿಸುತ್ತಾನೆ. ಇನ್ನೂ ರಕ್ತಸ್ರಾವವಾಗುತ್ತಿದ್ದಂತೆ, ಕೃಷ್ಣನು ಜಾರನಿಗೆ ಹೇಳಿದನು, "ಓ ಜರಾ, ನೀನು ನಿನ್ನ ಹಿಂದಿನ ಜನ್ಮದಲ್ಲಿ ವಾಲಿಯಾಗಿದ್ದೆ, ತ್ರೇತಾಯುಗದಲ್ಲಿ ರಾಮನಾಗಿ ನಾನೇ ನಿನ್ನನ್ನು ಕೊಂದಿದ್ದೆ. ಇಲ್ಲಿ ನಿನಗೊಂದು ಅವಕಾಶ ಸಿಕ್ಕಿತು ಮತ್ತು ಈ ಪ್ರಪಂಚದ ಎಲ್ಲಾ ಕ್ರಿಯೆಗಳು ನಾನು ಬಯಸಿದಂತೆ ಮಾಡಲಾಗುತ್ತದೆ, ಇದಕ್ಕಾಗಿ ನೀವು ಚಿಂತಿಸಬೇಕಾಗಿಲ್ಲ." ನಂತರ ಕೃಷ್ಣನು ತನ್ನ ಭೌತಿಕ ದೇಹವನ್ನು ತೊರೆದನು ಮತ್ತೆ ತನ್ನ ಶಾಶ್ವತ ನಿವಾಸವಾದ ವೈಕುಂಠಕ್ಕೆ ನಿರ್ಗಮಿಸಿದನು.

ಈ ಘಟನೆಯನ್ನು ಪ್ರತ್ಯಕ್ಷದರ್ಶಿಗಳಿಂದ ಹಸ್ತಿನಾಪುರ ಮತ್ತು ದ್ವಾರಕೆಗೆ ತಿಳಿಸಲಾಯಿತು. ಈ ಘಟನೆಯ ಸ್ಥಳವು ಸೋಮನಾಥ ದೇವಾಲಯದ ಬಳಿಯಿರುವ ಭಾಲ್ಕ ಎಂದು ನಂಬಲಾಗಿದೆ. ಪುರಾಣದ ಮೂಲಗಳ ಪ್ರಕಾರ ಕೃಷ್ಣನ ಕಣ್ಮರೆಯು ದ್ವಾಪರ ಯುಗದ ಅಂತ್ಯವನ್ನು ಮತ್ತು ಕಲಿಯುಗದ ಪ್ರಾರಂಭವನ್ನು ಸೂಚಿಸುತ್ತದೆ. ಕಲಿಯುಗದ ಆರಂಭವನ್ನು ಕೃಷ್ಣ ಪರಮಾತ್ಮನು ತೀರಿಹೋದ ಕ್ಷಣವೆಂದು ಪರಿಗಣಿಸಲಾಗಿದೆ.

ಪ್ರಸ್ತುತ ಸರ್ಕಾರವು ಈ ದೇವಾಲಯವನ್ನು ಪ್ರಮುಖ ಪ್ರವಾಸಿ ಆಕರ್ಷಣೆಯನ್ನಾಗಿ ಅಭಿವೃದ್ಧಿಪಡಿಸಲು ಯೋಜಿಸಿದೆ. ಸೋಮನಾಥ್ - ವೆರಾವಲ್ ನಗರ - ಭಾಲ್ಕಾ ರಸ್ತೆ ಮತ್ತು ರೈಲು ಮಾರ್ಗದ ಮೂಲಕ ಉತ್ತಮ ಸಂಪರ್ಕ ಹೊಂದಿದೆ. ಭಾಲ್ಕ ತೀರ್ಥಕ್ಕೆ ಭೇಟಿ ನೀಡಲು ಹತ್ತಿರದ ರೈಲು ನಿಲ್ದಾಣವೆಂದರೆ ವೆರಾವಲ್ ಮತ್ತು ಹತ್ತಿರದ ವಿಮಾನ ನಿಲ್ದಾಣಗಳು ದಿಯು ಮತ್ತು ರಾಜ್‌ಕೋಟ್.