ವಿಮಾನ ನಿಲ್ದಾಣದಲ್ಲಿ ಕಾಯುವಿಕೆ ಬೇಸರ ಮೂಡಿಸಿದೆಯೇ..?

ಉದ್ಯೋಗದ ಅಗತ್ಯಗಳಿಗಾಗಿ, ವ್ಯಾಪಾರ ಉದ್ದೇಶದಿಂದ ಅಥವಾ ಪ್ರವಾಸಕ್ಕಾಗಿ ಹೀಗೆ ನಾನಾ ಕಾರಣಗಳಿಂದಾಗಿ ನೀವು ಆಗಾಗ ವಿಮಾನ ಪ್ರಯಾಣಿಸುತ್ತಿದ್ದೀರಾ...?

ಹಾಗಾದರೆ ಪ್ರಯಾಣಕ್ಕಾಗಿ ಗಂಟೆಗಳ ಮುಂಚಿತವಾಗಿಯೇ ನೀವು ಏರ್‌ ಪೋರ್ಟ್‌ ತಲುಪಿರಬಹುದು, ವಿಮಾನ ಕ್ಯಾನ್ಸಲ್‌ ಆಗಿದ್ದ ವೇಳೆ, ಅಥವಾ ತಡವಾಗಿ ಬಂದಾಗಲೂ ಏರ್‌ ಪೋರ್ಟ್‌ ನಲ್ಲಿ ಕಾಯುತ್ತಾ ಕೂರುವ ಅನೇಕ ಸಂದರ್ಭಗಳನ್ನು ನೀವು ಹಾದುಹೋಗಿರಬಹುದು. ಕಾಯುವಿಕೆಯಷ್ಟು ಬೇಸರ ತರಿಸುವ ಸಂಗತಿ ಜೀವನದಲ್ಲಿ ಇನ್ನೊಂದಿಲ್ಲ ಅಲ್ವಾ..? ಅದರಲ್ಲೂ ನೀವೇನಾದರೂ ಒಬ್ಬಂಟಿಯಾಗಿದ್ದರೆ ಕೇಳುವುದೇ ಬೇಡ ಆ ಪರಿಸ್ಥಿತಿ.

ಆದರೆ ನೀವು ಎಲ್ಲರಂತೆ ಯೋಚಿಸುವವರಲ್ಲ ಎಂದಾದರೆ, ಈ ಕಾಯುವಿಕೆಯ ಸಮಯವನ್ನು ಬಹಳ ವಿಶೇಷವಾಗಿ ಸದ್ಬಳಕೆ ಮಾಡಿಕೊಳ್ಳಬಹುದು. ಪ್ರತಿ ವಿಮಾನ ನಿಲ್ದಾಣವೂ ವಿಭಿನ್ನವಾಗಿರುತ್ತವೆ. ಮುಖ್ಯವಾಗಿ ಮಹಾ ನಗರಗಳು, ವಿದೇಶಗಳನ್ನು ಸಂಪರ್ಕಿಸುವ ಬೃಹತ್‌ ವಿಮಾನ ನಿಲ್ದಾಣಗಳಲ್ಲಿ ಥಿಯೇಟರ್‌ ಗಳು, ಆರ್ಟ್‌ ಗ್ಯಾಲರಿಗಳು, ರೆಸ್ಟೊರೆಂಟ್ಸ್‌, ಹೊಟೇಲ್ಸ್‌, ಮಾಲ್ಸ್‌ ಹೀಗೆ ಸಾಕಷ್ಟು ಅವಕಾಶಗಳಿರುತ್ತವೆ. ಕಾದು ಬೇಸರದಲ್ಲಿ ಕೂರುವ ಬದಲಿಗೆ, ಸಿಕ್ಕಿರುವ ಸಮಯವನ್ನು ಹೇಗೆಲ್ಲಾ ಬಳಸಿಕೊಳ್ಳಬಹುದು ಎಂಬುದರ ಬಗ್ಗೆ ಸ್ವಲ್ಪ ಗಮನಹರಿಸಿ.

ವಿಮಾನ ನಿಲ್ದಾಣದಲ್ಲಿ ಬಿಡುವಿನ ಸಮಯವನ್ನು ಖುಷಿಯಿಂದ ಕಳೆಯಲು ಹೀಗೆ ಮಾಡಿ:

ವಿಮಾನ ನಿಲ್ದಾಣದ ಆರ್ಟ್ ಗ್ಯಾಲರಿಗಳತ್ತ ಗಮನಹರಿಸಿ

ಮನಸ್ಸಿಗೆ ನೆಮ್ಮದಿ ನೀಡುವ ಅನೇಕ ವಿಚಾರಗಳ ಪೈಕಿ ಚಿತ್ರಕಲೆ ಸಹ ಪ್ರಮುಖವಾದುದು. ಚಿತ್ರಗಳ ಪ್ರದರ್ಶನಕ್ಕಾಗಿಯೇ ಅನೇಕ ಆರ್ಟ್‌ ಗ್ಯಾಲರಿಗಳು ತಲೆ ಎತ್ತಿವೆ. ಅದರಲ್ಲೂ ನೀವು ಕಲೆಯಲ್ಲಿ ಆಸಕ್ತಿ ಹೊಂದಿದ್ದರೆ, ಸಾಮಾನ್ಯವಾಗಿ ವಿಮಾನ ನಿಲ್ದಾಣಗಳಲ್ಲಿ ಕಾಣಸಿಗುವ ಆರ್ಟ್‌ ಗ್ಯಾಲರಿಗಳಲ್ಲಿ ನಿಮ್ಮ ಕಾಯುವಿಕೆಯ ಸಮಯವನ್ನು ಕಳೆಯಬಹುದು.

ವಿಶ್ರಾಂತಿ ಕೊಠಡಿಗಳನ್ನು ಬಳಸಿಕೊಳ್ಳಿ

ವಿಮಾನ ನಿಲ್ದಾಣದಲ್ಲಿ ವಿಶ್ರಾಂತಿ ಬಯಸುವವರಿಗಾಗಿ ವಿಶ್ರಾಂತಿ ಕೊಠಡಿಗಳಿವೆ. ಇಲ್ಲಿ ವಿಶ್ರಾಂತಿಗಷ್ಟೇ ಅಲ್ಲದೆ, ಆಹಾರ ಸೇವನೆಗೆ ಆರಾಮದಾಯಕ ಸ್ಥಳವನ್ನು ನೀಡಲಾಗುತ್ತದೆ. ಕೆಲಸ ಮಾಡುವವರಿಗೆ ಅನುಕೂಲಕ್ಕಾಗಿ, ಪ್ರವಾಸಿಗರಿಗಾಗಿ ಉಚಿತ ವೈ-ಫೈ ಸೌಲಭ್ಯವನ್ನೂ ಕಲ್ಪಿಸಲಾಗಿದೆ. ಇದು ನಿಮ್ಮ ಕಾಯುವಿಕೆಯಲ್ಲಿ ಇನ್ನಷ್ಟು ಖುಷಿ ನೀಡುತ್ತದೆ.

ಸ್ಥಳೀಯ ಖಾದ್ಯಗಳ ರುಚಿಯನ್ನು ತಿಳಿಯಿರಿ

ವಿಮಾನ ನಿಲ್ದಾಣಗಳಲ್ಲಿ ಸಾಕಷ್ಟು ಹೊಟೇಲ್‌ ಗಳು, ದೇಶವಿದೇಶಗಳ ಅತ್ಯದ್ಭುತ ರೆಸ್ಟೋರೆಂಟ್‌ ಗಳಿರುತ್ತವೆ. ಬಿಡುವಿದೆ ಎಂದಾದರೆ ಸ್ಥಳೀಯ ಆಹಾರಗಳ ರುಚಿ ಹೇಗಿದೆ ಎಂದು ಒಂದು ಬಾರಿಯಾದರೂ ಟೇಸ್ಟ್‌ ನೋಡಿ. ಅಲ್ಲದೇ ವಿದೇಶಿ ನೆಲಗಳ ಖಾದ್ಯಗಳ ರುಚಿ ನೋಡಲು ಮರೆಯಬೇಡಿ.

ವಿಮಾನ ನಿಲ್ದಾಣದ ಸುತ್ತ ಹೆಜ್ಜೆ ಹಾಕಿ

ವಿಮಾನ ನಿಲ್ದಾಣಗಳು ಸಾಕಷ್ಟು ವಿಶಾಲವಾಗಿ ಹರಡಿಕೊಂಡಿರುತ್ತವೆ. ಇಲ್ಲಿ ಏನಿಲ್ಲ, ಏನುಂಟು ಎಂಬುದನ್ನು ತಿಳಿಯಲು, ಅನ್ವೇಷಿಸಲು ಸಾಕಷ್ಟು ಸಮಯ ಬೇಕಾಗುತ್ತದೆ. ಅಲ್ಲದೆ ಚೆಕ್-ಇನ್‌ನಿಂದ ಟೇಕ್‌ಆಫ್, ಲಗೇಜ್ ನಿರ್ವಹಣೆಯವರೆಗೆ, ಎಲ್ಲವೂ ಹೇಗೆ ಸುಲಭ ಸಾಧ್ಯವಾಗುತ್ತದೆ ಎಂಬೆಲ್ಲದನ್ನೂ ತಿಳಿಯುವುದಕ್ಕಾಗಿ ಈ ಬಿಡುವಿನ ವೇಳೆಯನ್ನು ನೀವು ಬಳಸಿಕೊಳ್ಳಬಹುದು.

ಬುಕ್‌ ಸ್ಟಾಲ್‌ ವಿಸಿಟ್‌ ಮಾಡಲು ಮರೆಯದಿರಿ

ಒಬ್ಬಂಟಿ ಎಂದೆನಿಸಿದಾಗ ಕೈಯಲ್ಲೊಂದು ಪುಸ್ತಕವಿದ್ದರೆ ಯಾರೋ ಆಪ್ತರೇ ನಮ್ಮ ಜೊತೆಗಿದ್ದಾರೋ ಏನೋ ಎಂಬ ಭಾವನೆ ಮೂಡಿಸುತ್ತದೆ. ವಿಮಾನ ನಿಲ್ದಾಣದಲ್ಲಿ ಪುಸ್ತಕ ಮಳಿಗೆಯಿದ್ದರೆ ಅಲ್ಲಿಗೊಮ್ಮೆ ಭೇಟಿ ನೀಡಿ, ನಿಮ್ಮ ಆಯ್ಕೆಯ ಪುಸ್ತಕವನ್ನು ಕೊಂಡುಕೊಂಡು ಓದಬಹುದು. ಇಲ್ಲವಾದರೆ ಪ್ರಯಾಣದ ವೇಳೆ ಜೊತೆಗಿರಲಿ ಎಂದು ಒಂದೆರಡು ಪುಸ್ತಕವನ್ನಿಟ್ಟುಕೊಡರೆ, ಹೀಗೆ ವಿಮಾನ ನಿಲ್ದಾಣದಲ್ಲಿ ಕಾದು ಬೇಸರವಾದ ವೇಳೆ ಒಂದು ಕಪ್ ಕಾಫಿ ಅಥವಾ ಚಹಾ ಹೀರುತ್ತಾ ಪುಸ್ತಕಗಳ ಪುಟಗಳನ್ನು ತಿರುವಿಹಾಕುತ್ತಿರಬಹುದು. ಏನಂತೀರಿ..?

ಹೀಗೆ ಮುಂದಿನ ಬಾರಿ ನೀವು ವಿಮಾನ ನಿಲ್ದಾಣದಲ್ಲಿ ಒಂದಷ್ಟು ಹತ್ತು ಬಿಡುವಿದ್ದು, ಕಾಲ ಕಳೆಯುವುದು ಹೇಗೆ ಎಂಬ ಚಿಂತೆಯೆದುರಾದರೆ, ತಪ್ಪದೇ ಈ ಮಾಹಿತಿಯನ್ನು ಉಪಯೋಗಿಸಿಕೊಳ್ಳಿ.